Б.Бямбасайханы авааль эхнэр Б.Ариунаа: Миний хүүхдүүдийг сонгуульд ашиглан худал ярихаа зогсоо

УИХ-ын энэ удаагийн сонгуулийн дуулиан бол нэр дэвшигчдийг сурталчилгааных нь үеэр баривчилсан явдал байв. Түүний нэг нь АН-аас Дархан-Уул аймагт нэр дэвшиж буй Б.Бямбасайханы баривчилгаа болон түүнээс үүдсэн сошиал дуулиан байлаа.

Тодруулбал, түүний эхнэр гэх Д.Өнөржаргал өөрийн болон нэр дэвшигчийн сошиал хуудсаар гэр бүлийнхээ талаар, тэр дундаа зургаан хүүхдийн эцэг эх хэмээн ярьсан нь энэхүү асуудлын эхлэл болов. Б.Бямбасайханы хувьд олон жилийн өмнө эхнэр Б.Ариунаатайгаа АНУ-д хуримлаж, хоёр хүүхдийн эцэг эх болж, улмаар 12 жилийн хамтын амьдралыг туулж, хожим тусдаа байх болсон. Б.Ариунаагийн хувьд элит гаралтай, нийгэмд тодорхой байр суурь эзэлдэг, нэр хүндтэй дипломатын охин гэдгээр нь хүмүүс мэддэг.

Тэгвэл тэрбээр өчигдөр өөрийн сошиал хуудсанд “Миний хоёр хүүхдийг /хүний өөрийн нийлбэр дөрөв дээрээ/ нэмж, зургаан хүүхэдтэй эцэг эх гэж ярьдгаа болиосой” хэмээн нийтэлсэн байв. Сонгуулийн сурталчилгааны үеэр Д.Өнөржаргал хүүхдүүдийг нь өөрийн хүүхдүүд хэмээн олон нийтэд худал мэдээлэл түгээж, бүр нэвтрүүлэг хүртэл хийсэн түүний төдийгүй бусад олон хүний дургүйцлийг төрүүлж байгааг дурджээ. Энэ дагуу бид түүнтэй холбогдож дараах тодруулгыг авсан юм.

 -Сайн байна уу. Та өөрийн сошиал хуудсанд нэр дэвшигч Б.Бямбасайханы эхнэр хэмээн өөрийгөө танилцуулсан Д.Өнөржаргал гэх эмэгтэйд зориулж бичсэн пост тань олон хүний анхаарлыг татсан. Мөн таныг одоо ч албан ёсны эхнэр нь, гэр бүл нь гэж яригддаг. Энэ талаар тодруулж болох уу?

-Д.Өнөржаргал гэх эмэгтэй олон нийтийн сүлжээгээр миний гэр бүлийн нэр хүндэд удаа дараа халдсан, үр хүүхдүүдтэй минь холбоотой ташаа мэдээлэл тарааж байгаад миний хувьд эгдүүцэж, бас гайхаж байна. Тухайлбал, өчигдөр буюу 6 сарын 18-нд тэр эмэгтэй “Би зургаан хүүхэдтэй” гээд миний албан ёсны гэр бүл болж төрүүлж, өсгөсөн хүүхдүүдийг минь оруулж ичихгүй, ямар ч нүүрний хувиралгүй худлаа ярьж, нэвтрүүлэг хүртэл бэлдээд олон нийтийн сүлжээнд тавьж байна.

Энэ бол байж боломгүй асуудал. Яагаад гэвэл, хэрэв энэ эмэгтэй миний нөхөр бид хоёрыг салсны дараа учирсан байсан бол, мөн хэрэв бид хоёрыг атгаг зорилгоор хагацаасан хүн биш байсан бол, түүнчлэн манай хадмуудыг гэр бүлийн маань эсрэг турхирсан этгээд биш байсан бол хамаа алга, хэдэн хүүхдүүдээ нийлүүлээд тоолж болж байна. Тэр байтугай хүүхдийн баярыг хамтдаа мормонууд шиг тэмдэглэж ч болж байна.

Миний хувьд Б.Бямбасайхантай 18-хан насандаа буюу 20-иод жилийн өмнө албан ёсоор гэр бүл болж, энэ хугацаанд хоёр хүүхдийн аав, ээж болсон.

Гэтэл Өнөржаргал гэх эмэгтэй манай гэр бүлийг үймүүлж, өөрийн бага насны хүү болон нөхрөө орхин байж, нөхрийг маань гэрээс нь авч явж байр хүртэл түрээсэлж, нэг өвөрт орсон байж өнөөдөр ичихгүй ийм зүйл ярьж явна.

Боловсролтой, потенциалтай, чадвартай залуугийн улс төрийн карьер, сонгуулийн нөхцөл байдлыг ашиглан өөрийгөө удаа дараа худал ярьж дөвийлгөн сурталчилж, албан ёсны зургаан хүүхэдтэй эхнэрийн дүрд тоглож байгаа нь миний болон миний ээж аав ах дүү, нөхөр бид 2-ын дундын найзуудын гайхшрал, эгдүүцлийг ихээр хүргэж байна.

Цаашид ийм худал, хуурмаг зүйл ярьж явааг нь зүгээр хараад суухгүйг анхааруулмаар байна. Хэдийгээр би ажил хэргийн чиглэлээс хамаараад аль болохоор хэвлэл мэдээллээс хол байхыг эрмэлздэг боловч эх хүний үнэт зүйл, тээж төрүүлж, өсгөсөн алаг үрсийг минь өөртөө нааж, ашиглаж байгаа нь маш их дургүй хүргэж байна. Түүнчлэн хүний нөхрийг хулгайлж авсан явдал чинь, увайгүй ичих нүүргүй худал ярьсан бүх зүйл чинь цаг хугацаа өнгөрөхөөр үнэн болно гэсэн ойлголт байхгүй.

Энэ хүний нэр хүнд болон карьер надтай байхад ямар байсан одоо ямар байгаад дүгнэлт хийж, мөн авааль эхнэр нь 2 охинтойгоо хэлгүй дүлий сохор мэт, эзгүй арал дээр цөлөгдсөн мэт битгий дураараа аашил. Өөрийн тань анхны авааль нөхөрт  болон том болсон хүүд чинь ч эвгүй байгаа нь тодорхой.

-Уучлаарай тэгэхээр та хоёр одоо ч албан ёсны эхнэр нөхөр хэвээрээ гэсэн үг үү?

-Би энэ талаар яриад, тайлбар тавиад байх дүргүй. Гэхдээ тийм ээ. Бид албан ёсоор гэрлэлтээ цуцлуулаагүй.

Америк болон Монгол Улсын хуулиар батлуулсан гэр бүл.

-Хэзээ гэр бүл болж байсан бэ?

-20 жилийн өмнө Америкт /инээв/. Тухайн үед бид Америкт танилцаад амьдралаа тэнд эхлүүлж, анхны  бүхий л сайхан зүйлсээ бүтээж байлаа. Хүсэн хүлээсэн, өөрийг нь хуулбарласан мэт дуурайсан хэний ч өмнө нүүр улайхааргүй зөв хүмүүжилтэй, ах захтай, ажилсаг хоёр сайхан охиныг нь төрүүлж, өсгөж, анх аав болгож өгсөнд Б.Бямбасайхан одоо ч баярлаж, санаа тавьж явдаг.

-Та хоёрыг гадаадад их олон жил амьдарсан гэж сонсож байсан. Ер нь яг юунаас болоод та хоёрын зам салах болсон юм бэ?

-Д.Өнөржаргал гэх энэ хүүхэн манай бага хүүхдийг нэг настай байхад /2009-2010 он/ шөнийн цагаар гар утасны мессэжээр байнга эргүүлддэг байсан. Тухайн жилийн зун нь би Манилад хүүхдүүдээ харж байхад манай хүн ажлаар Монгол  руу 7 хоногоор явсан юм. Тэр үед манай найзууд энэ хоёр хүнийг хүнсний дэлгүүрийн кассан дээр хамт явж байхыг хараад надтай шууд утсаар холбогдож анх хэлж байлаа.

Цаашдаа улам цайрч энэ эмэгтэй манай гэр бүлийн бага охиноо өлгийдөж аваад удаагүй байсан аз жаргалтай үеийг бусниулж, үнэт зүйл рүү маань халдаж, эв түнжинтэй байдлыг алдагдуулсан.

Яахав, энэ бүдүүлэг эмэгтэй зорилгоо биелүүлж чадсан нь миний хэтэрхий соёлтой, гэр бүлийн зөв хүмүүжил, шударга байдал, бардам зангаас, араас нь хулгана муур болж хөөцөлдөөгүй, нөхрийнхөө ухаанд тэр байдлыг нь даатгаж итгэж орхисонтой холбоотой явдал юм.

-Та Б.Бямбасайханд одоо ч гомдол тээж явдаг уу?

-Б.Бямбасайханы хувьд бид хоёр ариун нандин унаган хайрын түүхтэй, хажууд нь хэд дэх эмэгтэй нь байгаагаас үл хамааран энэ насаараа хүүхдүүдээрээ холбогдож, сайхан харилцаатай явах хүмүүс. Цаашид бид хоёр эмээ өвөө болно, үр хүүхдээ хуримлуулна, энэ бүгдэд хүмүүс өөр өөрийн байх байрандаа байхыг хүсмээр байна.

Манай хүн бол үнэхээр улс төрч хүнд байвал зохих бүхий л зан чанаруудыг өөртөө агуулсан, чадвартай хүн. Бид 2 залуу наснаасаа дэлхийн хэмжээний нийт 5 их дээд сургууль дүүргэсэн, МУ-ын төрд зүтгэхэд хангалттай бэлтгэгдсэн хүмүүс.

Хувийн амьдралаас нь болж саад бэрхшээл бүү үүсээсэй, хажуудах хүнээ сайн таньж, өөрийн үнэ цэнэ, үнэт зүйлсээ алдахгүй өөрийгөө хэн гэдгээ харуулаасай гэж хүсч байгаа. Гэрлэлт гэдэг бол библийн сургаал шиг, судар ном шиг гарын авлагатай ирдэггүй учраас залуу насны жаахан үл ойлголцол, гомдол тунирхал бусдын амьдралыг сүйтгэдэг энэ мэт нөхдөд боломж олгодог нь харамсалтай.

Г.Сар