ЭМЯ: Улаанбаатарт 21 хүнээс халдвар илэрч, бүртгэгдсэн халдварын тоо 1263 боллоо

БАЯНЗҮРХ ДҮҮРГИЙН НЭГДСЭН ЭМНЭЛЭГ БОЛОН ХСҮТ-Д БҮРТГЭГДСЭН ХАЛДВАРУУДЫН ОЙРЫН ХАВЬТЛУУДААС ШИНЭ ТОХИОЛДОЛ БҮРТГЭГДЛЭЭ

ХӨСҮТ-ийн Тандалт, судалгааны төвийн дарга А.Амбасэлмаа “2021 оны нэгдүгээр сарын 2-ны өдөр 5,807 хүнд шинжилгээ хийхэд 21 хүнээс коронавирусийн халдвар илэрсэн. Энэ нь Баянзүрх дүүргийн нэгдсэн эмнэлэг болон ХСҮТ-д батлагдсан тохиолдлын ойрын хавьтал хэмээн ажиглан, тусгаарлаж байсан иргэдэд хийсэн 2-3 дахь давтан шинжилгээгээр халдвар илэрсэн. Шинээр бүртгэгдсэн 21 тохиолдол бүгд ажиглалт, тусгаарлалтад байсан.

Баянзүрх дүүргийн нэгдсэн эмнэлэгт маш том голомт гарсан. Энэ голомтын үргэлжлэх хугацаа дуусаагүй байна. Голомтын хавьтлуудыг хянах 14 хоногийн хугацаа дуусаагүй. 400 орчим хавтлыг ажиглалтын 14 хоногийн хугацааг дуусгаж, гэрийн ажиглалтад шилжүүлсэн. Одоогоор 900 орчим ойрын хавьтлыг ажиглалт, тусгаарлалтад авсан. Мөн хоёрдогч хавьтал 2000 гаруй хүн байна. Халдварын дэгдэлттэй холбоотой гэр бүлийн, гэр бүлээс дамжсан дам халдварын голомтууд үүсэж байна. Ялангуяа Улаанбаатар хотод том голомтуудаас 1-2 голомтын эх уурхайг тогтоогоогүй байна. Үргэлжлүүлэн тандажлт судалгааг хийж байна. Ард иргэдийн дунд шинж тэмдэггүй, хөнгөн өвчилсөн хүн явж байхыг үгүйсгэхгүй. Тиймээс дэгдэлтийн дараа халдварт өртөхөөс сэргийлэх хэрэгтэй. Амны хаалт зүүх, бөөгнөрөл үүсгэхгүй байхад онцгой анхаарахыг хүсэж байна” гэлээ.

Ингэснээр улсын хэмжээнд бүртгэгдсэн нийт халдварын тоо 1263 болоод байгаа бол дотоодын нийт халдварын тоо 776-д хүрээд байна.

Халдвар бүртгэгдсэн газруудыг харуулбал,

1. Улаанбаатар хотод 450,
2. Сэлэнгэ аймагт 217,
3. Дархан-Уул аймагт 45,
4. Дорноговь аймагт 32,
5. Орхон аймагт 25,
6. Говьсүмбэр аймагт 4,
7. Архангай аймагт 3 тохиолдол тус тус бүртгэгдээд байна.

НИЙСЛЭЛД БҮРТГЭГДСЭН ХАЛДВАРЫН ТОО 450-Д ХҮРЛЭЭ

Улаанбаатар хотод гарсан нийт 450 халдвар болоод байна. Үүнд:

• Баянзүрх дүүрэг 264,
• Баянгол дүүрэг 52,
• Сонгинохайрхан дүүрэг 38,
• Хан-Уул дүүрэг 38,
• Сүхбаатар дүүрэг 30,
• Чингэлтэй дүүрэг 25,
• Налайх дүүрэгт 2,
• Багануур дүүрэг 1 тохиолдол тус тус бүртгэжээ.

ДАХИН 14 ХҮН ЭДГЭРЧ, НИЙТ ЭДГЭРЭЛТ 869 БОЛЛОО

2021 оны нэгдүгээр сарын 3-ны өдрийн байдлаар дахин 14 хүн эдгэрч, нийт эдгэрсэн хүний тоо 869-д хүрээд байгааг ХӨСҮ-ийн Тандалт, судалгааны албаны дарга А.Амбасэлмаа хэллээ.

Сүүлийн 24 цагийн хугацаанд 14 хүн эмчлэгдэж, эмнэлгээс гарсан бөгөөд батлагдсан тохиолдлын 68.8 хувь нь эдгэрээд байна.

Өнөөдрийн байдлаар манай улсад халдварын 1263 тохиолдол бүртгэдээд байгаа бөгөөд үүний 869 нь эдгэрээд байна.

Нэгдүгээр сарын 3-ны өдрийн 11:00 цагийн байдлаар 384 хүн ХӨСҮТ, Цэргийн төв эмнэлэг, Хан-Уул дүүргийн 300 ортой эмнэлэг, Сэлэнгэ аймгийн нэгдсэн эмнэлэгт эмчлэгдэж байгаа бөгөөд

• 2 хүн маш хүнд,
• 9 хүн хүнд,
• 104 хүн хүндэвтэр,
• 269 хүн хэвийн гэсэн ангилалд хамаарч байгаа юм.

Улсын хэмжээнд коронавирусийг илрүүлэх тандалт судалгааны олон цэг ажиллаж байна. Өнөөдрөөс эхлэн  шинэ жилийн үеэр ажилласан үйлдвэр, томоохон худалдааны цэгүүдэд коронавирусийн шинжилгээ хийх явуулын цэгүүд ажиллаж эхэлж байгаа талаар Эрүүл мэндийн яамны ахлах шинжээч Д.Нарангэрэл мэдээллээ.