Сульшар: Өнгөрсөн жилийн аваргуудыг хожих сайхан байна

Английн хөл бөмбөгийн холбооны цомын тэмцээн “FA Cup”-ын дөрөвдүгээр шатны тоглолтууд үргэлжилж байна. Дэлхийн хамгийн эртний бөгөөд хамгийн олон баг оролцдог тус цомын тэмцээний хүрээнд Английн Премьер лигийн хамгийн том амжилттай Манчестер Юнайтед, Ливерпүүл клубүүд учраа таарлаа.

Премьер лигийн хүрээнд таван өдрийн өмнө тоглож 0-0 харьцаагаар тэнцээд байсан хоёр багийн энэ удаагийн тоглолтод таван гоол орсон. 3-2 харьцаагаар Манчестер Юнайтед хожсон тоглолтын гоолуудыг Мохамед Салах, Мейсон Гринвүүд, Маркус Рашфорд, Бруно Фернандеш оруулсан нар юм.

Тоглолтын эхний гоолыг Ливерпүүлээс Мохамед Салах 18 дахь минутад Роберто Фирминогийн дамжуулалтаар хийсэн бол 26 дахь минутад Маркус Рашфордын дамжуулалтаар Мейсон Гринвүүд хариуг нь барьсан. Улмаар хоёрдугаар үеийн 48 дахь минутад Маркус Рашфорд багтаа тэргүүллийг авчирсан бол Мохамед Салах дахин гоол оруулж тооны харьцааг тэнцүүлсэн байна.

Харин 75 дахь минутад Бруно Фернандеш чөлөөт цохилтоос Ливерпүүлийн хаалгач Алиссоны зүүн доод буланд хүчтэй цохилтоор хожлын гоолыг шигтгэсэн юм.

Ингэснээр Манчестер Юнайтед клуб “FA Cup”-ын тавдугаар шатанд Уэст Хэм Юнайтед клубтэй тоглохоор болсон бол Ливерпүүл тэмцээнээ өндөрлүүллээ.

Тоглолтын төгсгөлд Манчестер Юнайтедын дасгалжуулагч Оле Гуннар Сульшар “Өнгөрсөн жилийн аваргуудыг хожих гайхалтай юм. Сайн багийн эсрэг сайн үр дүн авлаа. Бид тоглогчдын аргыг олж баг улам сайжирсаар байна” хэмээжээ.

“FA Cup”-ын дөрөвдүгээр шатны сүүлийн хоёр тоглолт өнөөдөр Тоттенхэм – Уайкомб, Борнмут – Кроли Таун багуудын хооронд болно.

“FA Cup”-ын дөрөвдүгээр шатны үр дүн:

Чорли 0-1 Уолвес
Саутхемптон 1-0 Арсенал
Брайтон 2-1 Блэкпүүл
Милуолл 0-3 Бристол Сити
Барнсли 1-0 Норвич Сити
Шеффилд Юнайтед 2-1 Плимут
Уэст Хэм 4-0 Донкастер
Суонси Сити 5-1 Ноттингэм Форэст
Челтенхэм 1-3 Манчестер Сити
Челси 3-1 Лутон Таун
Фулхэм 0-3 Бөрнли
Брентфорд 1-3 Лестер Сити
Манчестер Юнайтед 3-2 Ливерпүүл
Эвертон 3-0 Шеффилд Уэнсдэй

Эх сурвалж: SkySports