Токио-2020 олимпийн наадам эхлэхэд 99 хоног үлдлээ

Цар тахлын улмаас нэг жил хойшлогдсон Токио 2020 зуны олимпийн наадмыг дамжуулах албан ёсны онцгой эрхийг 13 телевиз авч, өргөн дэлгэцээр шууд дамжуулан хүргэхээр боллоо. Тодруулбал C1, Eagle tv, News tv, EDU tv, ETV, Star tv, NTV, SBN tv, TM, TV8, TV9, UBS, VTV-үүд тус тус дамжуулах болсон байна. Өмнө нь, Монголын телевизүүд зуны олимпийн наадмыг 2008 болон 2012 онуудад хамтран дамжуулж байсан туршлагатай. Хамтран ажилласны хамгийн чухал ололт нь олимпийн бүхий л төрлийнтэмцээн уралдааныг олон сувгаар цаг алдалгүй шууд дамжуулах, үзэгчид сонирхсон спортоо мэргэжлийн тайлбартайгаар үзэх сонголтыг нээж өгсөн явдал байлаа. Телевизүүд нэгдсэн бодлого төлөвлөгөө, маркетинг, техник, технологи болон хүний нөөцөөр ажиллах бөгөөд энэ хүрээнд тус наадмыг угтсан мэдээ, мэдээлэл, нэвтрүүлгүүд, спортын контент бэлтгэж дээрх телевизүүдийн эфир болон мэдээллийн бусад хэрэгслээр жигд түгээх юм. Мөн олимпийн наадмын үеэр Токио хотноо дөрвөн сурвалжлах баг ажиллах бөгөөд тэмцээнд оролцож буй монгол тамирчдын мэдээлэл, наадмын эргэн тойронд болж буй үйл явдлыг хүргэхээр бэлтгэлээ ханган ажиллаж байна. Дуу дүрсний өндөр чанар, мэргэжлийн тайлбар, хамгийн олон спортын төрөл үзүүлэх, хамгийн олон телевиз нэгдсэн Олимпын наадам эхлэхэд 99 хоног үлдлээ.