Оросын тал Мариуполь хот дахь Украины зэвсэгт хүчинд бууж өгөх хугацаа өглөө

Олон хоног бүслэлтэд байгаа Азовын тэнгисийн боомт хот Мариуполь дахь Украины зэвсэгт хүчинд бууж өгөх хугацаа өгч байгаагаа Оросын тал Ням гарагт зарлажээ.

“Хотод хүмүүнлэгийн аймшигт сүйрэл болж буй тул зэвсгээ хураалгасан бүх хүнд Мариуполиос аюулгүй гарч явах боломж олгоно” гэж Оросын Үндэсний Батлан Хамгаалах Удирдлагын Төвийн захирал, хурандаа генерал Михайл Мизинцев өчигдөр мэдэгдсэн байна.

Бууж өгөх хугацаа Москвагийн цагаар Даваа гарагийн өглөөний 5:00 цагт дуусах гэнэ. Мариуполь хотоос гарч явах аюулгүй коридорыг баруун болон зүүн чиглэлд зэрэг нээхээ Оросын тал амлажээ.

Хоёрдугаар сарын 24-нд эхэлсэн Оросын эзлэн түрэмгийлэх дайнд хамгийн хохирол амссан хот Мариуполь болоод байгаа. Хотын байшин барилгын 80 хувь сүйрч, 400,000 оршин суугчийнх нь ихэнх хэсэг хоол хүнс, ус, цахилгаангүй бүслэлтэд байна.

Хэрвээ Украины зэвсэгт хүчин нөхцөлийг хүлээж авбал Даваа гарагийн өглөөний 10:00 цагаас эхлэн хүмүүнлэгийн коридоруудыг нээхээ Оросын тал амлажээ.

Мариупольд болж буй үйл явдалд Украин, Оросын талууд харилцан нэг нэгнээ буруутгасаар байна. Украины “нео нацистууд”, “дээрэмчид” хот дотор энгийн иргэдийн эсрэг аллага явуулж байгаа гэж Оросын тал буруутгаж байгаа.

Харин Бямба гарагт Украины ерөнхийлөгч Володимир Зеленский хэлсэн үгэндээ Мариуполийн бүслэлтийг “хэдэн зууны турш мартагдахгүй аймшиг” гэж нэрлэжээ.

Бямба гарагт Мариуполь хотын захиргаа Телеграм хуудсандаа өнгөрсөн долоо хоногт “хотоос дүрвэсэн хэдэн мянган иргэнийг Оросын тал хүчээр өөрийн нутаг руу нүүлгэсэн” гэж мэдээлсэн юм.

Өнгөрсөн долоо хоногт тус хотын драмын театрын барилгад Оросын тал агаарын цохилт өгснөөс дотор нь толгой хоргодож байсан мянга орчим энгийн иргэн нурангид дарагдсан юм. Нуранги дор амьд үлдсэн иргэдийг аврах ажиллагаа үргэлжилж байна. Сүүлийн мэдээллээр 130 орчим хүн амьд гарчээ.

Мариуполь хот нь Азовын тэнгисийн хамгийн том боомт хот бөгөөд Украин руу өмнөд ба дорнод хэсгээс довтолж буй Оросын цэргийн анги нэгтгэлүүдийн уулзах цэг тул стратегийн чухал ач холбогдолтойг тооцогдож байна.

Эх сурвалж: Reuters