Мариуполийн төмөрлөгийн үйлдвэрээс эхний хэсэг иргэдийг нүүлгэсний дараа Оросын бөмбөгдөлт үргэлжилжээ

Оросын цэргийн бүслэлтэд хоёр сар орчим хугацаанд байгаа Мариуполь хотын Азовсталь төмөрлөгийн үйлдвэрээс эхний хэсэг иргэдийг нүүлгэн шилжүүлэх ажиллагаа амжилттай хэрэгжиж чадлаа.

Өнгөрсөн амралтын өдрүүдэд дайтагч талуудын хооронд гал зогсоож, иргэдийг нүүлгэх ажиллагааг НҮБ болон Олон Улсын Улаан Загалмайн Нийгэмлэгийн оролцоотой зохион байгуулсан юм.

Ням гарагт эмэгтэйчүүд, хүүхдүүд, өндөр настнууд голдуу 100 гаруй хүнийг Азовсталийн газар доорх хонгилоос гаргаж, Украины хяналтад байгаа Запорожье хот руу автобусаар тээвэрлэсэн байна.

Запорожье нь Мариуполь хотоос баруун хойд зүгт 230 км зайтай оршдог.

Иргэдийн түрүүч Даваа гарагийн үдээс хойш Запорожьед ирсэн мэдээ ирж байна.

Мариуполиос энгийн иргэдийг нүүлгэн шилжүүлэх оролдлогууд өмнө нь амжилтгүй болж байв. Украины талын мэдээлснээр иргэдийг нүүлгэхээр тохиролцсон замууд руу Оросын талаас гал нээснээр ажиллагаанууд тасалдаж байжээ.

Мариуполийг хамгаалагчдын сүүлчийн түшиц газар нь Зөвлөлтийн үеийн аварга том үйлдвэрийн цогцолбор Азовсталь болоод байгаа.

Энд Украины 2,000 орчим цэрэг, 1,000 орчим энгийн иргэн толгой хоргодож байгаа гэж НҮБ, Улаан Загалмайн Нийгэмлэг үзэж байна.

Дайны өмнө 400,000 оршин суугчтай байсан Мариуполь хотод одоо нийтдээ 100,000 хүн үлдсэн гэсэн тооцоог гаргажээ.

Иргэдийг нүүлгэх ажиллагаа дууссаны дараа Оросын талаас Азовсталь үйлдвэрийг дахин бөмбөгдөж эхэлсэн байна. Оросын эзэмшилд 2014 онд орсон Крымийн хойгийг Донбассын бүс нутагтай хуурай газраар холбоход Мариуполь боомт хот чухал үүрэгтэй юм.