30 жил эрэн сурвалжлагдаж байсан Сицилийн мафийн боссыг Италид баривчилжээ

Сүүлийн 30 орчим жил эрэн сурвалжлагдаж байсан Сицилийн мафийн босс Маттео Мессина Денарог өчигдөр Палермо хотын хувийн эмнэлгээс баривчилснаа Италийн цагдаагийн газар мэдээлжээ.

Түүнийг биеэ эмчлүүлэхээр эмнэлэгт ирсэн тухай мэдээлэл аваад баривчлах ажиллагааг явуулснаа Италийн цагдаагийн тусгай хүч Карабинеригийн тэргүүн, генерал Паскале Ангелосанто ярьсан байна.

Эрэн сурвалжлагдаж эхлэхдээ залуу байсан Денаро одоо 60 настай юм.

Трапани боомт хотод хүчээ төвлөрүүлдэг тэрбээр Сицилийн Коза Ностра мафийн бүлгийн хамгийн том босст тооцогддог байжээ.

Мессина Денаро нь олон жил эрэн сурвалжлагдаж байсан мафийн хамгийн том гурван боссын сүүлчийнх нь байв.

Тэрбээр олон арван аллагын хэрэгт буруутгагдаж, хэд хэдэн удаа бүх насаар хоригдох эчнээ ял сонсож байжээ.

1992 онд Мафитай тэмцэгч прокурорууд болох Жованни Фалконе, Паоло Борселлино нарын амь насанд халдсан гэмт хэргийн дараа түүнийг баривчлахаар эрэн сурвалжилж эхэлсэн гэдэг.

Денаро бас бүлгээс нь урвасан гишүүний бага настай хүүг боомилон алж, цогцсыг нь хүчилд уусгасан аймшигт хэрэг үйлдэж байжээ.

1993 оны нэгдүгээр сарын 15-нд мафийн “боссуудын босс” гэгддэг Сальваторе “Тото” Рийнаг 23 жил эрэн сурвалжилсны эцэст Палермо хотоос баривчилж байв. Тэгвэл энэ өдрөөс яг 30 жил, нэг хоногийн дараа ийнхүү Денарог баривчилжээ.

Италийн ерөнхий сайд Жоржиа Мелони томоохон гэмт хэрэгтнийг баривчилсан явдал нь тус улсын хувьд “том ялалт” бөгөөд “мафийн өмнө хэзээ ч бууж өгөхгүйг батлан харуулсан” явдал болсныг сошиал хуудсандаа мэдэгджээ.

Италийн мафийн боссуудаас хамгийн удаан эрэн сурвалжлагдсан нь Бернардо Провензано юм. Тэрбээр 38 жилийн дараа 2006 онд Сицилийн Корлеоне хотын ойролцоох фермээс баригдаж байжээ.

Провензаног баривчилсныхаа дараа цагдаа нар Денарог эрэн сурвалжлах ажилд бүх хүчээ төвлөрүүлээд байсан юм.

Эх сурвалж: Associated Press