Грета Тунбэргийг цагдаа нар Германы нүүрсний уурхайн өргөтгөлийг эсэргүүцсэн цуглаанаас хүчээр авч явав

Өчигдөр Германы нүүрсний уурхайн дэргэд болсон эсэргүүцлийн жагсаалаас Шведийн ногоон хөдөлгөөний идэвхтэн Грета Тунбэргийг цагдаа нар хүчээр авч явжээ.

Тэрбээр сүүлийн хэдэн өдөр Германд болж буй ногоонтнуудын тэмцэлд оролцож байгаа юм.

Украины дайны улмаас Герман улс нүүрсийг эрчим хүчний үйлдвэрлэлдээ дахин ашиглаж эхлээд байгаа.

Энэ бодлогын хүрээнд өнгөрсөн оны аравдугаар сард Германы засгийн газар Европын хамгийн том нүүрсний уурхайг өргөтгөх гэрээг RWE компанитай байгуулсан юм.

Ингэхдээ уурхайн ойролцоох Люцерат тосгоныг буулгах шийдвэр гаргаж байжээ.

Гэхдээ үүний хариуд RWE компани анх төлөвлөж байснаасаа найман жилийн өмнө буюу 2030 он гэхэд баруун Германд нүүрсээр эрчим хүч үйлдвэрлэхээ зогсоох амлалт авсан байна.

Өөрөөр хэлбэл канцлер Олаф Шольцын засгийн газар цэвэр эрчим хүчний шилжилтийн завсрын үед нүүрсийг түр ашиглах шийдвэр гаргасан юм.

Гэвч энэ шийдвэрийг эсэргүүцсэн байгаль орчныг хамгаалах хөдөлгөөнийхөн Бямба гарагаас эхлэн Люцерат тосгоныг буулгахыг эсэргүүцэн цугларч эхэлжээ.

Эсэргүүцлийн арга хэмжээнд хүч нэмэхээр дэлхий дахинд алдаршсан Шведийн залуу тэмцэгч Грета Тунбэрг энд ирээд байв.

Даваа гарагийн байдлаар нийт 300 орчим тэмцэгч Люцерат тосгоныг эзэлж, эзгүй байшингуудад бэхлэлт байгуулан суурьшиж эхэлжээ.

Өчигдөр цагдаа нар тэднийг хүчээр тараах арга хэмжээ авсан байна.

Тунбэргийг тосгоноос хүчээр авч явсан ч албан ёсоор баривчлаагүйгээ цагдаагийн албанаас мэдээлжээ.

Эх сурвалж: AFP