“Хакеруудыг хакдсан” тухайгаа АНУ-ын эрх баригчид мэдэгдэ

Олон мянган удаагийн кибер халдлагаар хохирогчдоос нийтдээ $100 гаруй саяын барьцааны мөнгө аваад байсан Hive хакерын бүлгийн серверүүдийг гартаа оруулснаа АНУ-ын хууль зүйн яам өчигдөр мэдэгджээ.

Ингэснээр тус бүлгийн халдлагадаа ашигладаг программ, нууцлалын түлхүүр зэргийг олж авсан юм байна.

Hive нь байгууллагуудын компьютерын системийг эзэлж аваад барьцааны мөнгө авсны дараа чөлөөлдөг “ransomware” төрлийн халдлагын хамгийн аюултай бүлгүүдийн нэгд тооцогддог юм.

Тэд барьцааны мөнгийг криптовалют хэлбэрээр хүлээж авдаг.

“Бид үндсэндээ хууль ёсны арга хэрэгслүүдийг ашиглан хакеруудыг хакдаж чадлаа” гэж АНУ-ын ерөнхий прокурорын орлогч Лиза Монако өчигдөр Вашингтонд болсон хэвлэлийн хурлын үеэр мэдэгджээ.

Өнгөрсөн онд эхэлж, олон сар үргэлжилсэн ажиллагааны хүрээнд Холбооны Мөрдөх Товчооны мэргэжилтнүүд Hive бүлгийн серверүүдийг гартаа оруулж, халдлагаар олсон $130 орчим саяын хөрөнгийг нь битүүмжилж чадсан байна.

Hive бүлэг нь “ransomware-as-a-service” бизнес загвараар ажилладаг байжээ. Өөрөөр хэлбэл тэд халдлагын арга хэрэгслээ гүйцэтгэгчдэд зарж, олсон орлогоос нь хуваалцдаг байсан байна.

Ингэснээр өөрийгөө мөрдлөгөөс нууж, илрүүлэхэд хэцүү болгодог байжээ.

Тус бүлэг эмнэлгүүд, сургуулиудыг хохирогч болгодгоороо алдартай байв. Тухайлбал 2021 оны зун Hive бүлэг АНУ-ын дундад өрнөдийн бүс нутгийн нэг эмнэлгийн компьютерын систем, өвчтөний мэдээллийн санг түгжиж, бүх ажлаа цаасаар явуулахаас өөр аргагүй байдалд оруулж байжээ.

Өчигдөр АНУ-ын эрх баригчид Hive-ийн гишүүдээс хэн нэгнийг баривчилсан эсэх талаар мэдээлэл өгөөгүй байна. Гэхдээ Герман, Нидерландын хуулийнхантай хамтран ажиллаж байгаагаа мэдээлжээ.

Hive бүлгийн гишүүд хоорондоо орос хэлээр харилцаж байсан гэх мэдээлэл бий. Тиймээс Европын холбоотнуудтайгаа хамтран ажиллаж байгаа бололтой.

Сүүлийн жилүүдэд “ransomware” төрлийн халдлага дэлхий даяар эрчимтэй өсөж байгаа. Зөвхөн 2021 онд АНУ-ын компаниуд ийм төрлийн кибер халдлагаас $886 саяын хохирол амссан гэх албан ёсны тоо баримт байна.

Эх сурвалж: Reuters