Эрүүл мэндтэй нь холбоотой дуулиан дэгдсэнээс хойш Беларусийн ерөнхийлөгчийн зураг анх удаа нийтлэгджээ

Долоо хоногийн өмнө Москвагийн Улаан талбайд ялалтын баярын парадад оролцсоноос хойш Беларусийн ерөнхийлөгч Александр Лукашенко олны нүдэнд ил гараагүй нь түүний эрүүл мэндтэй холбоотой дуулиан дэгдэхэд хүргэсэн юм. Зарим эх сурвалж түүнийг Москвагаас яаралтай буцсаныхаа дараа эмнэлэгт хэвтсэн гэж мэдээлж байлаа.

Харин өчигдөр буюу Даваа гарагт Минскийн албаны Телеграм сувагт Лукашенкогийн гэрэл зураг, дүрс бичлэг анх удаа нийтлэгдсэн байна.

Зэвсэгт хүчнийхээ бэлэн байдалтай танилцаж буйг нь харуулсан дүрс бичлэгт Лукашенкогийн нэг гар зузаан боолттой, царай нь ядрангуй харагдаж, хоолой нь сөөнгө сул сонсогдож байв.

2020 оны сонгуулийн дараа эх орноосоо дүрвэсэн Беларусийн сөрөг хүчний удирдагч Светлана Тихановская дарангуйлагчийн эрүүл мэндтэй холбоотойгоор нөхцөл байдал хаашаа ч эргэхэд бэлтгэлтэй байхыг дэмжигчдэдээ уриалжээ.

Дүрс бичлэгт цэргийн дүрэмт хувцас өмссөн Лукашенко “Миний ойлгож байгаагаар нөхцөл байдал тийм ч ноцтой биш байна. Гэхдээ анхаарлаа сулруулж болохгүй” гэж генералууддаа хэлж буй нь бичигдсэн байна.

Хамтралын дарга асан Лукашенко 1994 оноос хойш Беларусь улсыг хатуу гараар удирдаж байгаа юм. Түүнийг “Европын сүүлчийн дарангуйлагч” гэж хочилдог.

2020 оны сонгуульд нөхрийнх нь өрсөлдөх эрхийг хасаж, шоронд хорьсны дараа Тихановская нэрээ дэвшүүлж, Лукашенкотой өрсөлдөж байв. Гэвч шударга бус сонгуулийн үр дүнд Лукашенко дахин сонгогдсоны дараа тэр эх орноосоо дүрвэсэн юм.

“Дарангуйлагчийн эрүүл мэндтэй холбоотой олон янзын цуурхал яригдаж байна. Бидний хувьд нэг л зүйл тодорхой. Нөхцөл байдал ямар ч хувилбараар эргэхэд бид бэлтгэлтэй байх ёстой. Беларусийг ардчиллын замд оруулах, үүнд Орос улс хөндлөнгөөс оролцохоос сэргийлэх хэрэгтэй. Олон улсын хамтын нийгэмлэг үүнд идэвхтэй, шуурхай байх шаардлагатай” гэж Тихановская өчигдөр твиттер хуудсандаа бичжээ.

Даваа гарагт зэвсэгт хүчнийхэнтэйгээ уулзах үеэр Лукашенко саяхан Оросын нутаг дэвсгэрт байлдааны хоёр нисэх онгоц, хоёр нисдэг тэрэг зэрэг сүйрсэн тохиолдлыг яриандаа дурдсан байна.

Учир битүүлэг дээрх сүйрэл Беларусьтай ойрхон оршдог ОХУ-ын Брянск мужийн нутагт Бямба гарагт болсон юм.

“Дөрвөн нисэх онгоц нэг дор буудуулж унасан тохиолдол манай ойролцоо гарсныг санах хэрэгтэй” гэж Лукашенко энэ үеэр ярьж байжээ.

Брянск мужид унасан онгоц, нисдэг тэрэгнүүдийг Украины талаас алсын тусгалын пуужингаар устгасан байж болзошгүй гэх хувилбар таамаг яригдаж байгаа. Гэхдээ Киевийн эрх баригчид үүнийг албан ёсоор хүлээн зөвшөөрөөгүй байна. Харин Оросын эрх баригчид үүнийг техникийн гэмтэлтэй холбоотой осол гэж мэдээлсэн юм.

Эх сурвалж: The Guardian