Ираны шүүхээс ял сонссон алдартай кино найруулагч эх орноосоо дүрвэжээ

Туурвисан уран бүтээлийнхээ төлөө Ираны шүүхээс ял сонсоод байсан алдартай кино найруулагч Мохаммад Расулоф эх орноосоо дүрвэснийг өчигдөр зарлажээ.

Амь насаа эрсдэлд оруулан байж тусалсан сайн санаат хүмүүсийн ачаар хил давж, “аюулгүй газарт” ирээд байгаагаа тэр өчигдөр Инстаграм хуудсандаа бичсэн байна.

Түүний сүүлийн уран бүтээл “Гэгээн инжрийн үр” нэртэй кино өнөөдөр нээгдэж буй Каннын кино наадамд оролцож байгаа юм.

Расулоф 2020 оны Берлиний кино наадмын дээд шагналыг Ираны цаазын ялын тухай өгүүлсэн “Муу хүн гэж байдаггүй” нэртэй киногоороо хүртэж байжээ.

“Намайг амар тайван замаар хилийн дээс алхаж, аюулгүй газарт хүрэхэд амь насаараа дэнчин тавьж тусалсан найз нөхөд, танилууд, сайн санаат хүмүүст талархаж байна” гэж тэр бичсэн байна.

Түүний өмгөөлөгч Бабак Пакниа “Мохаммад Расулоф найруулагч Иранаас дүрвэсэн бөгөөд Каннын кино наадамд оролцохыг нь би баталж байна” гэж хэвлэлд мэдэгджээ.

Ираны эрх баригчид Расулофт киногоо Каннын наадмаас буцааж татахыг албадан тулгасан ч тэр зөвшөөрөөгүй юм.

51 настай Расулоф ямар замаар хил давснаа дэлгээгүй ч цастай уулсын дүрс бичлэгийг сошиал хуудсандаа нийтэлснээс үзвэл Ирак, Туркийн аль нэгний хилийг нууцаар давсан бололтой байна.

Өнгөрсөн долоо хоногт Ираны шүүх түүнийг “үндэсний аюулгүй байдалд хохирол учруулсан” хэрэгт буруутгаж, найман жилийн хорих ял оноосон юм.

Расулоф өмнө нь хэд хэдэн удаа Ираны дэглэмийн шүүхээр шийтгүүлж байжээ.

Тухайлбал тэр 2017 оны Каннын кино наадмаас шагнал хүртсэн “Шударга хүн” бүтээлийнхээ төлөө 2019 онд нэг жилийн хорих ялаар шийтгүүлж байв.

2020 онд “Муу хүн гэж байдаггүй” киноныхоо төлөө төрийн эсрэг суртал нэвтрүүлэг явуулсанд буруутгагдаж, дахин нэг жилийн хорих ял сонсож байжээ.

Эх сурвалж: BBC