Сунгаанаас нэрээ татсан Байдены шийдвэрийг дэлхийн удирдагчид хэрхэн хүлээн авав?

АНУ-д төдийгүй дэлхийн нийтэд олны анхаарлыг татаад буй сэдэв бол яахын аргагүй Жо Байден Ерөнхийлөгчийн сонгуулийн сунгаанаас нэрээ татсан шийдвэр байна. Түүнийг нэрээ татах болсныг бусад улсын удирдагчид хэрхэн хүлээн авав?

АНУ-ын түнш орны тэргүүнүүд Байдены дээрх шийдвэрийг хүндэтгэж буйгаа илэрхийлж, хүндхэн сонголт байсан хэмээн ярьж байна.

Өнгөрсөн долоо хоногт НАТО-гийн дээд хэмжээний уулзалтаар Байдентай уулзсан Украины Ерөнхийлөгч Володимир Зеленський түүнийг Украины эрх чөлөөний төлөө тууштай тэмцэж, дэмжсээр ирсэнд нь талархал илэрхийлжээ.

Герман улсын Канцлер Олаф Шольц, Байдены ачаар Атлантын далай дамнасан хамтын ажиллагаа болон НАТО-д ахиц дэвшил гарсан. АНУ нь бидний хувьд найдвартай түнш юм. Байден дахин нэр дэвшихгүй байх шийдвэр гаргасныг бид үнэлэх ёстой гэв.

Их Британийн шинэ Ерөнхий сайд Кир Стармер Байдены шийдвэрийг хүндэтгэж байгаагаа илэрхийлээд үлдсэн бүрэн эрхийнх нь хугацаанд хамтран ажиллахыг хүлээж байна хэмээн мэдэгдсэн.

Мөн “Ерөнхийлөгч Байден Америкийн ард түмний ашиг сонирхолд нийцнэ гэж бодсон зүйлдээ үндэслэн уг шийдвэрийг гаргасан гэдгийг би мэдэж байна” гэв.

Канадын Ерөнхий сайд Жастин Трюдо Ерөнхийлөгч болон тэргүүн хатагтайд талархаж буйгаа илэрхийлээд Байденыг канадчуудын “жинхэнэ найз” хэмээн тэмдэглэв.

Польшийн Ерөнхий сайд Дональд Таск “Байден улс төрийн карьерынхаа хугацаанд дэлхийг аюулгүй, ардчилал, эрх чөлөөг хүчтэй байлгах хүнд шийдвэрүүд гаргаж ирсэн. Энэ удаагийн асуудалд ч мөн тэрбээр адилхан зарчмаар хүнд шийдвэрийг гаргалаа” хэмээжээ.

Японы Ерөнхий сайд Фүмио Кишида Байдены мэдэгдлийг АНУ-ын ерөнхийлөгчийн хувьд “түүний хийж чадах хамгийн сайн улс төрийн шийдвэр” болсон гэсэн байна.