Талын мэлтэсийн алтыг ухах О.Амгаланбаатар нарын хүсэл унтрахгүй

Өнгөрөгч баасан гарагт УИХ-ын гишүүн О.Амгаланбаатар Ан амьтны тухай хуульд нэмэлт өөрчлөлт оруулж байгаа тухай мэдээлэл хийх нэрээр Нарансэвстэйн боомт, хилийн зурвас дагуу сэтгүүлчдийг авч явах тухай эвтэйхэн мэдэгдэл хийв. Н.Алтанхуяг, Ч.Сайханбилэг нарын /2012, 2015/ Засгийн газрын үеэс Нарансэвстэйн боомтыг нээх даалгавар авсан О.Амгаланбаатар ганц энэ удаа ч сэтгүүлчдийг урьж байгаа хэрэг биш.

Урьд өмнө Засаг даргаар ажиллаж байхдаа сэтгүүлчдийн баг хилийн зурвас дагуу аялуулж байсан нөхөр. Энэ удаад ээлжит тархи угаалтаа хийхээр зэхснээ Амьтдын тухай хуулиар далимдуулан зарлаад авав бололтой. Түүний ярьж байгаагаар бол алтайчууд болон баруун бүсийнхэн 1700 километрийн хол зам туулж, Замын-үүд боомтоор өргөн хэрэглээний бараа бүтээгдэхүүн, бусад зүйлээ авахад санхүү болон бусад зүйлд хүндрэл гардаг. Тиймээс Нарансэвстэйн боомтыг нээснээр 500-600 километрт зорчиж, өргөн хэрэглээний бараа бүтээгдэхүүнээ авна. Ингэхдээ дархан цаазат газрыг тойруулаад автозам тавьчихна хэмээн залж зогсоно лээ.

Энэ нь хүн өнгөц харахад ийн ойлгогдож болох ч боломжгүй зүйл гэдгийг манай сонин өмнөх гурван дугаартаа тайлбарласан билээ. Замаа бариад байгаль экологио хамгааллаа гэж бодоход хятадын талаас чухам ямар бараа таваар авах гээд байгаа юм. Манзуншань боомт гэх зэлүүд газраас ямар бараа татах юм. Үүнээс цааш хамгийн ойр дөт нь 320 километрт орших Үймэн хотоос юу авах юм. Тэгэхээр Ланжу хот хүртэл 1049 километр туулж, бараа таваар татана гэвэл Замын-Үүдээс ялгарах юмгүй. Аанай л 1700 орчим километр туулна.

Хятадууд хэрвээ зөвшөөрвөл Манзуншань боомтыг бараа таваараар хангаад зах зээлийн бүс болгон хөгжүүлж, Эрээн шиг болгочих байх. Гэтэл хятадуудын ойрын төлөвлөгөөнд энэ тухай дурдаагүйг ч дэлгэрэнгүй бичсэн. Тэгэхээр улс төр, бизнес бүлэглэлийн Нарансэвстэйн боомтыг нээх Талын мэлтэсийн алтыг ухах төлөвлөгөө эрчимжих бололтой. О.Амгаланбаатар нарын боомт нээх нэрээр Талын мэлтэсийн орд газрыг дархан цаазат газраас гаргачих гэсэн чин хүсэл ийнхүү аймгийн Засаг дарга байхаас эхлэн, алс баруун Алтайгаас Төрийн ордон хүртэл арав гаруй жил өрнөж байна. Мөн ч их хүсэл тэмүүлэл шүү.

С.Баяр