АНУ-ын Ерөнхийлөгч Дональд Трамп тангараг өргөж, албан тушаалдаа орлоо

АНУ-ын 47 дахь ерөнхийлөгч Дональд Трампын тангараг өргөх ёслол Капитолийн толгой дээрх Конгрессын ордны 1000 хүний багтаамжтай Ротонде төв танхимд болж өнгөрлөө. Төрийн тэргүүн Үндсэн хууль болон эх орондоо үнэнч байх тангарөг өргөв.

Тэрээр эхлээд Библи судар дээр гараа тавьж байгаад “Дональд Жон Трамп би бүх хүчээ дайчлан АНУ-ын ерөнхйилөгчийн үүргийг шударгаар гүйцэтгэж, АНУ-ын Үндсэн хуулийг хамгаалж, баримтлахаа ёслол төгөлдөр тангараглаж байна” гэсэн уламжлалт тангарагийн үгийг хэлэв.

АНУ-ын ерөнхийлөгчийн тангараг өргөх ёслолд анх удаа гадаадын удирдагчид оролцжээ. Тэдний дотор Аргентины ерөнхийлөгч Хавьер Милей, Италиын ерөнхий сайд Жоржа Мелони, Эквадорын ерөнхийлөгч Даниэль Нобоа, БНХАУ-ын орлогч дарга Хань Жэн, Энэтхэгийн гадаад хэргийн сайд Субраманьям Жайшанкар, Японы гадаад харилцааны сайд Такэси Ивая нар багтсан байлаө.

АНУ-ын ерөнхийлөгч Дональд Трамп тангараг өргөх ёслол дээр үг хэлэхдээ Америкийн ажилчид болон гэр бүлүүдийн ашиг сонирхлыг хамгаалахын тулд худалдааны тогтолцоогоо шинэчлэхээр төлөвлөж байгаагаа зарлав.

“Бусад улсыг баяжуулахын тулд ард түмэндээ татвар ногдуулахын оронд бид иргэдээ баяжуулахын төлөө гадаадын орнуудын бараанд гаалийн болон бусад нэвтрүүлнэ” гэж Трамп онцолсон байна.

АНУ газар нутгаа өргөжүүлэн тэлэх, Ангараг гаргийг эзэмшихийг эрмэлзэх болно гэж Трамп хэлэв. Мөн тэрээр энх тайван тогтоогч ерөнхийлөгч байхыг эрмэлзэх юм байна.

Дональд Трамп бас Мексиктэй залгаа өмнөд хил дээрээ онц байдал тогтоож, тийшээ цэрэг илгээх тухай зарлигт даваа гарагт гарын үсэг зурахаар төлөвлөж байгаа аж. ”Америкийг бүрэн сэргээж, эрүүл ухааны хувьсгал өрнүүлж эхлэх боломж олгох түүхэн хэд хэдэн баримт бичигт өнөөдөр би гарын үсэг зурна” гэж тэр онцлов.

АНУ-ыг дэлхийн хамгийн хүчтэй зэвсэгт хүчинтэй болгож, аюулгүй байдлаа бэхжүүлж, олон улсын тавцан дээрх нэр хүндээ өндөрт өргөнө гэж Трамп мөн амлав.

Мөн тэрээр мөнгөний ханшийн уналтыг бууруулах, эрчим хүчний эх үүсвэрийн олборлолтыг нэмэгдүүлэхтэй холбоотой зарлигуудад гарын зурах юм байна. ”Америкийн алтан зуун яг одоо эхлэж байна. Манай улс цэцэглэн хөгжиж, дэлхий даяар нэр хүндтэй болно. Бүх улс бидэнд атаархана. Бид дахин хэзээ ч бусдад ашиглуулахгүй” гэж тэр тэмдэглэсэн байна.

”Өнөөдөр манай Засгийн газар дотоодын энгийн хямралыг зохицуулж чадахгүй байгаагийн зэрэгцээ хилийн чанад дахь сүйрэлт үйл явдлуудад бүдэрч байна. Үүнийг өөрчилнө” гэж Трамп хэллээ.

Түүнчлэн Америкийн засаг захиргаа зөвхөн эрэгтэй, эмэгтэй гэсэн хоёр хүйсийг л хүлээн зөвшөөрнө гэж АНУ-ын ерөнхийлөгч тангараг өргөсөн өдрөө мэдэгдлээ.