Хотын мэр асан Э.Бат-Үүл хотод “ХИЧЭЭЛ ЗААНА”

Улаанбаатар хотын нэн тулгамдсан асуудлыг шийдэх Ерөнхий сайдаар ахлуулсан Шуурхай штаб байгуулагдан ажлаа эхэлсэн. Гишүүдэд нь Хотын дарга Х.Нямбаатар болон сайд дарга нар багтсан том баг бүрэлдсэн. Гэтэл энэ багт хичээл заах багш бас хэрэгтэй болсон уу, хотын гоёл, соёл юу болохыг сайн мэддэг 40 мянгатынхнаас төлөөлөл урих шаардлага гарсан уу,эсвэл өчигдөргүй өнөөдөр гэж байдаггүй нь МАН-ынхны орой руу орсон уу,  ямартай ч Хотын экс дарга Э.Бат-Үүлийг багтаа урьсан.

Түүний хувьд Хотын даргаар муугүй ажилласан. Өнөөгийн дарга Х.Нямбаатар шиг эрсдэл, шинэчлэл аль алийг л хийж явсан. Харамсалтай нь гэр хорооллын дахин төлөвлөлт дээр хүүгийнхээ компанийг оруулсан, тендер өгөхдөө “По” М.Ганбаатар  нарын гар хөл болох нэг ч ажилчингүй “цүнхний компани”-д зөвшөөрөл өгсөн зэргээс болж буруудсан. Хотын даргаас бууснаас хойш Украиныг дэмжиж, туг далбааг нь барьж гүйх, жагсах зэргээр “гудамжинд гарсан” түүнийг Улаанбаатар хотын нэн тулгамдсан асуудлыг шийдэх Шуурхай штаб эгнээндээ авснаар  ийнхүү дээш нь залжээ.

“Хотын төлөө албан тушаалгүй ч зүтгэнэ” хэмээсэн Э.Бат-Үүл цаашид Улаанбаатар хотын агаарын бохирдлыг бууруулах, дэд бүтцийн бүтээн байгуулалтын төсөл, арга хэмжээг хэрэгжүүлэхэд дэмжлэг үзүүлэх, салбар хоорондын зохицуулалт, шуурхай удирдлагаар хангах Шуурхай штабын зөвлөхөөр ажиллахаар болсон аж. Харин Ардчилсан намынхан нь түүнийг МАН-ынханд зүтгэх гэлээ хэмээн буруутгаж, шүүмжилж, “хэрүүлийн алим” энд тэндгүй өнхөрч буй сурагтай.