“MARS-V” төслийн баг Монголын говьд марсын орчин бүрдүүлэх боломжийг судалж байна

Сансрын технологийн шинжлэх ухааны туршилт, судалгаа, хөгжүүлэлтээр дамжуулан дэлхийд Монгол Улсын үнэ цэнийг өсгөх боломжийг олгож буй “Марс Ви” төслийг хэрэгжүүлэхэд дэмжлэг үзүүлэх чиг үүрэг бүхий ажлын хэсгийг 2022 оноос хойш миний бие ахлан ажиллаж байна.

Гурван жилийн өмнө цаасан дээр байсан төслийн тооцоолол, судалгаа, туршилтын ажлууд өнгөрсөн хугацаанд алхам алхмаар урагшилж, эхнээсээ бодит ажил хэрэг боллоо. Монгол Улсын Засгийн газраас “Марс Ви” төслийг хэрэгжүүлэхэд дэмжлэг үзүүлэх чиг үүрэг бүхий ажлын хэсэг байгуулагдсанаас хойш 13 томоохон ажлыг хийж гүйцэтгэсэн байна.

Монголын сансрын судалгаа хөгжүүлэлтийн төвийн “МАРС-ВИ” төслийн баг 2025 онд:

-Говийн бүс нутагт Марс гарагтай төсөөтэй байгалийн онцлогт суурилсан Марсын аналоги бэлтгэлийн төв байгуулах

-Олон Улсын сансар судлалын хамтын судалгааны уулзвар цэг байх, хамтын ажиллагааны таатай орчин бүрдүүлэх

-Инновацад суурилсан өндөр технологийн экспортод чиглэсэн бүтээгдэхүүн хөгжүүлэлтэд анхаарах

-Технологийн шинэчлэл хийх зэрэг ажлуудыг хийж гүйцэтгэхээр төлөвлөжээ.

Монгол Улсын Засгийн газраас “Марс Ви” төслийг хэрэгжүүлэхэд бүх талаар дэмжлэг үзүүлэн ажиллах бодлого баримталж байна.

“Марс Ви” төслийг хэрэгжүүлэхэд дэмжлэг үзүүлэх чиг үүрэг бүхий ажлын хэсгийн 2025 оны анхны хуралдааныг энэ сардаа багтаан зохион байгуулна.

2024-2028 оны Монгол Улсын Засгийн газрын үйл ажиллагааны хөтөлбөрт шинжлэх ухаан, сансрын технологи, цахим хөгжил, инновацыг чухалчилж авч үзэж байгаа бөгөөд “Марс Ви” төсөл нь сэргээгдэх эрчим хүчний төслүүд, агаар, орчны бохирдлыг бууруулах, говийн бүсэд үйл ажиллагаа явуулж байгаа уул уурхайн нөхөн сэргээлт, цэвэр усны асуудал, байгалийн гамшигт үзэгдлийн хор хохирлыг бууруулах зэрэг Тогтвортой хөгжлийн зорилтын хүрээний олон салбарын уулзвар дээрх томоохон мега төслүүдийг хэрэгжүүлэх үндэс суурь болох юм.