Украины ерөнхийлөгч: АНУ-ын Европт үзүүлэх дэмжлэг цаашид баталгаатай байхаа больсон

Украины Ерөнхийлөгч Владимир Зеленский Европыг нэгдсэн армитай болж, хамтын гадаад бодлоготой болохыг уриалж, АНУ-аас Европт үзүүлж байсан баталгаатай дэмжлэгийн үе дуусаж байгааг анхаарууллаа.

Энэ долоо хоногт ОХУ-ын Ерөнхийлөгч Владимир Путин болон АНУ-ын Ерөнхийлөгч Дональд Трамп нарын хооронд болсон утасны яриа Киевын аюулгүй байдалд сөргөөр нөлөөлж болзошгүй байдалд хүргэсэн. АНУ-ын Цагаан ордон Украиныг НАТО-д элсүүлэх асуудлыг ач холбогдолгүй мэтээр дүгнэж, хэлэлцээрээс Украин үл тоогдож эхэлж байгаа гэсэн айдас төрүүлжээ. Зеленский Мюнхений аюулгүй байдлын бага хурал дээр бямба гарагт үг хэлэхдээ, “Хэдхэн хоногийн өмнө Ерөнхийлөгч Трамп надтай ярилцахдаа Путинтэй хийсэн ярианыхаа талаар хэлсэн. Гэхдээ нэг ч удаа ‘Америкт Европ хэрэгтэй’ гэж дурсаагүй.

Энэ өөрөө ихийг хэлж байна” гэж онцлоод “АНУ Европыг үргэлж дэмждэг байсан хуучин цаг ард өнгөрлөө. Европ өөрийн гэсэн армитай болох ёстой ” хэмээн тэр нэмж хэлэв. Мюнхений аюулгүй байдлын чуулганд Зеленский сэтгүүлч Кристиан Аманпуртай тайзан дээр ярилцахдаа “Трампын эхний дипломат яриа Путинтэй байсанд сэтгэл дундуур байсан. Одоо харин Трамп Путинтэй Зеленскийгээс өмнө уулзвал бүр ч аюултай, Трамп өөртэй нь эхэлж уулзах ямар нэгэн зүйл дурдаагүй хэдий ч Украины дайныг дуусгах тодорхой төлөвлөгөө боловсруулахын тулд Трамптай яаралтай уулзах хэрэгтэй” хэмээн Зеленский мэдэгдсэн байна.

      Зеленскийгийн мэдэгдлийн өмнөх өдөр АНУ-ын дэд Ерөнхийлөгч Ж.Ди Ванс, Мюнхений бага хурал дээр Европын холбоотнуудыг шүүмжлэх үедээ түүний үгэнд Украин болон Оросын асуудлыг бараг дурдаагүй нь анхаарал татав. Зеленский Европыг нэгдсэн армитай болохыг уриалж, АНУ цаашид Европт цэргийн дэмжлэг үзүүлэх нь баталгаагүй болсон гэдгийг хүлээн зөвшөөрч эхэлжээ.

“Бодит байдалтай нүүр тулцгаая, одоо АНУ-аас Европын аюулгүй байдалд хамаатай асуудлаар бидэнд анхаарал хандуулахгүй байх магадлал тун өндөр боллоо. Олон улсын удирдагчид Европ өөрийн гэсэн батлан хамгаалах хүчинтэй байх ёстой тухай удаа дараа ярьж байсан. Бидэнд Европын арми хэрэгтэй” гэж тэр хэлэв. “Өчигдөр Мюнхенд АНУ-ын дэд ерөнхийлөгчийн мэдэгдэл энэ бүгдийг маш тодорхой болголоо. Европ, Америкийн олон арван жилийн харилцааны үе дуусаж байна. Одооноос бүх зүйл өөрчлөгдөнө, Европ үүнд зохицон бэлтгэгдэх шаардлагатай” гэж Зеленский онцлов.

ЗЕЛЕНСКИЙ: “ПУТИН ТРАМПЫГ АШИГЛАХЫГ ХҮСЭЖ БАЙНА”

Цаашлаад Путин АНУ-ын ерөнхийлөгчтэй ганцаарчилсан хэлэлцээр хийх замаар дэлхийг өөрийн хүссэнээр хуваах гэж оролдож байгааг анхааруулжээ. “Путин энэ оны тавдугаар сарын 9-нд АНУ-ын ерөнхийлөгчийг Москвагийн төв талбай болох Улаан талбайд урихыг оролдоно. Гэхдээ энэ бүгд Трампыг нэр хүндтэй удирдагчийн хувиар бус, өөрийн тоглолтод оролцогч мэт харагдуулахыг хүсэж байгаа. Бидэнд энэ хэрэггүй” гэж Зеленский мэдэгдэв. Илтгэлийн үеэр Зеленский “Би Трампт Путин түүнээс айдаг гэж хэлсэн, тэр ч сонссон. Одоо Путин ч үүнийг мэдэж байгаа” хэмээн Зеленский хошигнон хэлэхэд танхим дүүрэн инээд цуурайтжээ.

Мөн Зеленский, Путин НАТО-д хамгийн их нөлөө үзүүлж байна хэмээн онцолж, “Одоогийн байдлаар НАТО-гийн хамгийн нөлөө бүхий гишүүн нь Путин бололтой учир нь түүний хүсэл сонирхол НАТО-гийн шийдвэрийг хааж чадаж байна. Украины оролцоогүйгээр ямар ч энхийн хэлэлцээр хийх ёсгүй гэдгийг дахин сануулаад Украины талаарх шийдвэрийг Украингүйгээр гаргахгүй. Европын талаархи шийдвэрийг Европгүйгээр гаргахгүй.

Европ өөрийг нь хөндсөн асуудлаар хэлэлцэх ширээнд заавал суух ёстой” гэж тэр хэлжээ. Зеленскийн энэхүү мэдэгдлийн дараа Польшийн Ерөнхий сайд Дональд Туск Европ яаралтай арга хэмжээ авахгүй бол Украины асуудлыг бусад томоохон улс орнууд өөрсдийнхөөрөө шийдвэрлэх эрсдэлтэйг санууллаа. “Энэ төлөвлөгөөг яг одоо боловсруулж хэрэгжүүлэх хэрэгтэй. Цаг алдах эрх бидэнд байхгүй” гэж Туск “Х” (хуучнаар Twitter) платформд бичжээ.