Ким Сү Хёны агентлагаас МЭДЭГДЭЛ гаргажээ

Жүжигчин Ким Сү Хёны харьяа Gold Medalist агентлагаас юүтүб хуудаснаа цацагдаад буй мэдээллийг нэн даруй няцааж, Ким Сү Хёныг гүтгэсэн, талийгаач жүжигчин Ким Се Руны тухай илтэд худал мэдээлэл тараасан тохиолдолд хуулийн хариуцлага хүлээлгэх болно гэжээ.

Энэхүү мэдэгдэлд “Сайн байна уу. Gold Medalist агентлаг байна. Жүжигчин Ким Сү Хёны талаар Garosero-ийн юүтүб хуудсаар цацсан талаар бид албан ёсны мэдэгдэл хийхээр шийдлээ. Уг бичлэгт дурдсан бүх зүйл худал. Тэд Ким Сү Хён юүтүбэр И Жин У-тай хамтран талийгаач Ким Се Руныг дарамталсан хэмээн дээрх бичлэгт дурдсан байсан.

Мөн Ким Сү Хён нь талийгаач Ким Се Рунтай 15 настайгаас нь хойш романтик харилцаатай байсан, түүнийг согтуугаар автомашин жолоодсон хэрэг гарсны дараа компани нь нөхцөл байдлыг буруугаар зохицуулсан, тэр ч бүү хэл манай ажилчдын нэг нь юүтүбэр И Жин У-г биечлэн мэддэг байсан хэмээсэн байсан. Манай агентлаг болон Ким Сү Хёныг буруутгасан өнгө аяс бүхий энэхүү мэдээлэл нь худал бөгөөд хүлээн зөвшөөрөхгүй байгаагаа хэлмээр байна. Бид одоогоо худал мэдээлэл тараасан хэргээр Garosero-ийн эсрэг хуулийн дагуу арга хэмжээ авах болно.

Манай агентлагийн харьяанд байсан талийгаач Ким Се Рун таалал төгссөнд гүнээ харамсан эмгэнэл илэрхийлж байна. Гэсэн хэдий ч Garosero-оос ийм мэдээлэл цацсан нь талийгаачийн амьд ахуйдаа амссан кибер дээрэлхэлтийг дахин өдөөж байна. Эдгээр үйлдэл нь зөвхөн юүтүбэрийн хувийн ашиг сонирхлын үүднээс компани болон талийгаачийн нэр хүндийг гутаан доромжилж байна. Бид үүнийг тэвчиж чадахгүй. Эдгээр ор үндэслэлгүй мэдээллийг цаашид түгээн дэлгэрүүлж, олшруулах, хуулбарлахгүй байхыг бид чин сэтгэлээсээ хүсэж байна” гэжээ.

Талийгаач бүсгүйн үхэлд түүний аав юүтүбэр И Жин У болон өөр нэгэн юүтүбэрийг буруутгаж буйгаа мэдээлсэн. Тэдэнд хуулийн дагуу арга хэмжээ авна хэмээсэн бол Garosero-ийн цацсан мэдээллийг талийгаачийн эгч өгсөн тухай эх сурвалж дурдсан байна.