Л.Наранбаатар: СЕХ намайг биш Монголыг минь хорлож байна

УИХ-ын 22 дугаар тойрогт “Сахигтун! Үндсэн хуулийн 19” эвслээс нэр дэвшигч, эдийн засагч Лүндэгийн Наранбаатарыг Сонгуулийн ерөнхий хорооноос бүртгээгүй байна. Уг асуудлаар тэрбээр сэтгүүлчдэд хандан байр сууриа илэрхийллээ.

-Таныг яагаад сонгуульд нэр дэвших эрхгүй гэж үзсэн юм бэ?

-Өнөөдөр Сонгуулийн Ерөнхий Хороо Монгол Улсын Үндсэн хуулиар олгогдсон сонгох, сонгогдох эрхэд минь маш бүдүүлгээр халдлаа. Ямар ч үндэслэлгүйгээр миний нэрийг хоёр газраас дэвшсэн байна гэсэн үндэслэлээр хасчихлаа. Энгийнээр жишиж хэлэх юм бол, МАН-ын дарга У.Хүрэлсүхийг юм уу, эсвэл АН-ын дарга С.Эрдэнийг ч юм уу “Зөв хүн электорат” эвслийн нэр дэвшигчдийн нэрсийн жагсаалтад оруулчихвал хоёр газраас нэр дэвшиж байна гээд хасах нь байна. Гэтэл Сонгуулийн тухай хуульд нэр дэвшигч гэж хэнийг хэлэхийг тодорхой заасан байдаг. Нэр дэвшээд, СЕХ-ноос батламжаа авсан хүнийг хэлдэг юм.

-“Зөвхөн хүн электорат” эвсэл таны нэрийг яагаад жагсаалтдаа оруулсан юм бэ?

-“Зөвхөн хүн электорат” эвслээс надад “Манай эвслээс нэр дэвших үү” гээд санал тавьсан. Би эвслийн нэг бүрэлдэхүүн Монголын социал демократ намтай ярилцаж, санал солилцож байсан зүйл бий. Гэхдээ албан байдлаар эцэслээгүй. Социол демократ намаас “Зөв хүн электорат” эвслээс Дарханд нэр дэвших санал тавьсан. Миний хувьд “Санал тавьсанд баярлалаа. Би та бүхний саналаас татгалзаж байна” гэсэн албан бичгээ бичээд твиттер, фэйсбүүктээ хүртэл постолж байсан.

Албан ёсоор нэр дэвшигч болохын тулд өөрийн гараар, албан ёсоор өргөдөл бөглөдөг. Хэрэв би “Зөв хүн электократ” эвслээс нэр дэвших бол намайг нэр дэвшүүлнэ үү гээд гараараа өргөдөл бичээд, анкет бөглөх ёстой. Долоо, найман бичиг баримт бүрдүүлэх ёстой. Ийм бичиг баримт бүрдүүлээгүй байхад “Зөв хүн электократ” эвслээс намайг Дархан-Уул аймгийн 19 дугаар тойрогт нэр дэвшинэ гэж бичээд явуулсан нь өөрөө хууль зөрчсөн үйл ажиллагаа.

-СЕХ-ны энэ шийдвэрийг та ямар шалтгаантай холбож үзэж байна вэ?

-Би албан ёсоор Монголын консерватив нам, Монголын хүний төлөө намын “Сахигтун! Үндсэн хуулийн 19” эвслээс Баянзүрх дүүргийн 22 дугаарт тойрогт нэр дэвшсэн. Яагаад гэвэл би Баянзүрх дүүргийн 26 дугаар хороонд амьдардаг. Баянзүрх бол миний дүүрэг. Тиймээс “Сахигтун! Үндсэн хуулийн 19” эвслээс нэр дэвшсэн. Гэтэл СЕХ-нд “Зөвхөн хүн электорат” эвслээс өгсөн албан бичигт “Л.Наранбаатар нь нэр дэвшихээс өөрөө татгалзсан” гэсэн байгаа. Мөн би ийм саналаас нь татгалзсан гэсэн албан бичгээ СЕХ-нд өгсөн. Би үүнийг цаанаа СЕХ МАНАН-гийн, эрхтэн дархтны гар хөл болж ажиллаж байна гэж харлаа. Намайг сонгуульд нэр дэвшүүлэхгүйн тулд сүүлийн тав, зургаан жилд хууль хүчний байгууллагууд хэчнээн зовоож, хэчнээн хэрэг үүсгэж шалгав.

Өнөөдөр Монгол Улсад Үндсэн хуулиар олгогдсон эрхээ залуучууд эдэлж чадахгүй байна. Энэ хэдэн хөгшин улстөрчид сэхээтэн залуучуудыг өрсөлдөх гэхээр эрх мэдлээ ашиглаж, сонгох, сонгогдох эрхэд бүдүүлгээр халдаж байна. Энэ бол төрийн эрхийг хууль бусаар авах гэсэн ажиллагааны нэг хэсэг ч гэж дүгнэж хэлмээр байна. Намайг хүчтэй өрсөлдөгч гэж харсан учраас хугацаа хожих хар арга хэрэглэж байна.

-Та цаашид ямар арга хэмжээ авах вэ?

-Би СЕХ-оог Захиргааны хэргийн шүүхэд өгч байна. Намайг хорлож байгаа үйлдэл. Шүүхээр ямар нэгэн байдлаар эцсийн шийдвэр гаргууллаа гэхэд сонгуульд өрсөлдөх хоног, хугацаа маань дуусчих байх. Гэхдээ би үнэний төлөө явна. Баянзүрх дүүргийн 22 дугаар тойрогт маш олон сонгогч намайг дэмжиж байсан. Тэдний итгэл рүү СЕХ ус цацлаа шүү. Үндсэн хуулийн сонгох, сонгогдох эрхэд халдлаа шүү. Төрийн эрхийг хууль бусаар авах ажиллагаа руу явлаа шүү. Ийм бузар, булай байдлыг зогсоох ёстой.