Б.Батзаяа: Хамгийн гоё хайр бол хүүхдүүдийнхээ инээгээд хөгжилдөхийг харах юм

Дорноговь аймгийн DTV-гээс зохион байгуулсан “Гэр бүлээрээ хамтдаа” бүжгийн уралдааны нэгдүгээр байрыг эзэлсэн дөрвөн хүүхдийн ээж Б.Батзаяагийн гэр бүлийг танилцуулж байна. Б.Батзаяа 20 настайдаа анхны үрээ өлгийдөн авчээ. Одоо 33 настай тэрээр 1-13 насны дөрвөн хүүхдийн ээж юм. СУИС-ийг бүжгийн багш мэргэжлээр төгссөн тэрээр өөрийн төрсөн хоёр дүү болон дөрвөн хүүхдийнхээ хамт Дорноговь аймагт амьдарч буй юм. Арав гаруй жил Улаанбаатарт амьдарсан тэрээр төрсөн нутагтаа ажиллаж, амьдрах шийдвэрийг энэ жил гаргасан байна.

Анх нутагтаа очихдоо зургаан ханатай хуучин гэр худалдаж авснаа будаж янзлан шинэ мэт болгожээ. Доторх тавилга, гэрлэн чимэглэл гээд өөртөө болон хүүхдүүддээ таалагдах орчинг бүрдүүлэхээр хичээж буй аж.

Үргэлж инээд хөөр цалгиж, хайр ундарч байдаг энэ гэр бүлийн авьяаслаг охид ээжтэйгээ хамтран бүжиглэсэн бичлэг фэйсбүүкт нийтлэгдсэнээсээ хойш хоёр долоо хоногийн дотор 900 мянган хүнд хүрч, 79 мянган лайк авчээ.

Ингээд зөв үлгэр дуурайл, хөдөлмөрч зангаараа хүүхдүүдээ өсгөхийг эрмэлздэг Б.Батзаяагийн ярилцлагыг хүргэж байна.

–Сайн байна уу? Юуны түрүүнд манай уншигчдад өөрийгөө танилцуулаач?
-Сайн байцгаана уу? Намайг Б.Батзаяа гэдэг. 33 настай, дөрвөн хүүхдийн ээж. Дорноговь аймгийн Сайншанд хотын 5-р сургуульд ажилладаг.

–“Гэр бүлээрээ хамтдаа” бүжгийн уралдаанд оролцож, нэгдүгээр байр эзэлсэн. Энэ тэмцээнд хэрхэн оролцсон тухайгаа хуваалцаач?
-Энэ бичлэгийг нийтэлсний дараа маш олон хүн холбогдсон. Үнэхээр итгэмээргүй байсан. Би сонирхлоороо хүүхдүүд, дүү нартайгаа бүжгийн бичлэг хийдэг юм. Тэгээд энэ бүжгийн уралдааны зарыг хараад бэлдэж эхэлсэн. Өдөрт 30 минут бэлдсэн. Нийт 2-3 цаг л зарцуулсан байх.

–Хүмүүс мянга, мянгаараа лайк дараад, бичлэгийг нь түгээгээд байхыг харах ямар санагдсан бэ?
-Бидний уралдаандаа зориулж бэлдсэн бичлэг маань тоглуулж болохгүй болсон. Тэгээд өмнө нь хийж байсан бичлэгээ явуулсан. Түрүүлж бичлэгээ явуулсан хүмүүсийн лайк, шэйр нэмэгдээд л. Манай охид эхэндээ их сэтгэлээр унасан. Бичлэг маань олон хүнд хүрэхгүй юм байна гэж бодсон байх. Тэгээд өөрсдийнхөө бичлэгийг нийтлүүлснийхээ дараа ойр, тойрны хүмүүс рүүгээ явуулсан. Харин орой харсан чинь манай бичлэг тэргүүлээд эхэлсэн. Бид нар бөөн баяр. Хүүхдүүдтэйгээ хамт догдолж, баярлаж байсан. Үнэхээр сонин, гоё мэдрэмж байсан шүү.

–Уг уралдааны шагналыг гардуулах ажиллагаа цахимаар болсон. Тухайн үеийн мэдрэмжээсээ хуваалцаач?
-Энэ тэмцээний нэгдүгээр байрын шагнал 150 мянган төгрөг байсан. Охид маань уралдаанд бичлэгээ явуулахдаа л түрүүлбэл мөнгөөрөө юу хийхээ бодчихсон байсан. Хамгийн түрүүнд бие биедээ баяр хүргээд торт авч иднэ гэж ярьж байсан. Шагнал гардуулах өдөр Дорноговь телевизээс холбогдоод лайваар холбогдох тухай хэлсэн. Ингээд бид анх удаа орон нутгийн телевизээр гарч шагналаа авсан. Мөн санаанд оромгүй маш олон сайхан сэтгэлтэй хүмүүсээс манай гэр бүлд бэлэг ирсэн. Хүүхдүүдийн минь хүсээд байсан тортноос гадна таван сагс өндөг, хүүхдүүдэд маань тус бүрд нь ууттай бэлэг, надад арьс арчилгааны бүтээгдэхүүн хүртэл өгсөн. Шагналын мөнгөө авсан хүүхдүүд хамгийн түрүүнд гэртээ гэрлэн чимэглэл авахыг хүссэн. Хэдийгээр гэрт амьдардаг ч гэсэн байшингийн цонхонд өлгөдөг гэрлэн чимэглэл авсан. Бүгд нөгөө гэрлээ асаагаад сэтгэл дүүрэн байсан.

ХӨДӨӨ АМЬДРАХ ДАВУУ ТАЛУУДЫГ ЖАГСААЖ БОДОЖ БАЙГААД НУТАГТАА ИРСЭН

–Бичлэг дээр гэр нь үнэхээр гоё харагдаж байсан. Маш олон хүн “ямар гоё айл вэ” гэх сэтгэгдэл бичсэн байна лээ?
-Манайх зургаан ханатай гэрт амьдардаг. Би Улаанбаатар хотод арав гаруй жил амьдарч байгаад энэ жил нутагтаа амьдрахаар ирсэн. Энэ гэрийг ээж маань авч өгсөн. Хэдийгээр хуучин гэр ч гэсэн бид будаж, янзлаад орсон. Гэрээ эхнээс нь тохижуулж эхэлсэн. Охидтой амьдардаг болохоор гэр маань цэмцгэр байдаг. Шинэ юм авахаар хүүхдүүд маань бөөн баяр болдог.

Хамгийн бага охины теле хичээл өглөө 10:00 цагаас эхэлнэ. Тэгээд бүгд ээлжлээд зурагтынхаа өмнө сууж байгаад хичээлээ хийнэ. Давтаж үзэх боломж бага учраас бүгд яг цагаа алдалгүй хичээлээ хийдэг.

–Хөл хорио тогтоосон энэ үед хүүхдүүдийнх нь нэг өдөр хэрхэн өнгөрч байна?
-Би өөрийн дөрвөн хүүхэд болон, төрсөн хоёр дүүтэйгээ цуг амьдардаг. Таван охин нэг сургуульд явдаг. Хамгийн бага охины теле хичээл өглөө 10:00 цагаас эхэлнэ. Тэгээд бүгд ээлжлээд зурагтынхаа өмнө сууж байгаад хичээлээ хийнэ. Давтаж үзэх боломж бага учраас бүгд яг цагаа алдалгүй хичээлээ хийдэг. Тэгээд даалгавар болон нэмэлт өөрийгөө хөгжүүлэх зүйлс хийнэ. Хүүхдүүд маань өдөр бүр таван шинэ англи үг цээжилдэг. Орой нь намайг би цээжилсэн үгээ шалгуулъя гэсээр угтдаг. Хүүхдүүд маань онлайн сургалтад хамрагдмаар байна. Шинэ ном авмаар байна гэх мэтээр боловсролдоо их анхаардаг. Өөрсдөө шинэ зүйл сурах гэж чармайдаг. Энэ хүслүүдийг нь биелүүлэхээр л ажиллаж байна даа. Манай гэрт хоёр утас бий. Нэг нь минийх, нэг нь том охиных. Теле хичээлээсээ хоцорсон тохиолдолд дата авч байгаад утсаараа үздэг. Хэнд дата байна гээд, утасныхаа симийг сольж байгаад л интернет ордог.

–Гал түлэх, усаа авахаас эхлээд айл гэрийн ажил барагддаггүй шүү дээ. Гэрийн ажлаа хэрхэн зохицуулж байна вэ?
-Хоол хийх, гал түлэх зэрэг хүүхэд хүрч болохгүй ажлаа би өөрөө хийнэ. Харин охид маань өглөө босоод хуваарийн дагуу гэрээ цэвэрлэдэг. Хэн аяга угаах, шал угаах зэргээ өдөр өдрөөр өөрсдөө хуваарилж хийдэг. Гэрийн ажлыг огт хэлүүлэхгүйгээр өөрсдөө цэмцийтэл хийдэг дээ.

–Та хүүхдүүдтэйгээ их нээлттэй харилцдаг бололтой. Тантай хүсэл, мөрөөдлөө хэр их хуваалцдаг вэ?
-Манай хүүхдүүд их яриасаг. Нэг нь юм яриад эхлэхээр л бүгдээрээ ээлжлээд ярих гээд хүлээж байдаг. Маш олон сэдвийн хүрээнд яриа дэлгэдэг. Хүсэл, мөрөөдлийнхөө тухай их ярьдаг. Хамгийн түрүүнд хүүхдүүдийнхээ хүсэл сонирхлыг сонсож, мэргэжлээ сонгоход нь тусална гэж бодож байна.

–Олон хүүхэд өсгөнө гэдэг амаргүй шүү дээ. Одоо бол хүүхдүүд нь учир ойлгодог том болсон байна.
-Олон том хүний дунд нэг бяцхан хүүхэд гараад ирэхээр их зүйл өөрчлөгддөг юм билээ. Хүүхэд бол бүхний хайрыг татдаг эрдэнэс шүү дээ. Манай хадмууд бүх зүйлд их тусалдаг. Тиймээс сурахынхаа хажуугаар хүүхдээ өсгөсөн. Хүүхдүүдийнхээ бүх зүйлд хариуцлагатай хандахыг хичээдэг.

ХААНА, ЮУНД АМЬДАРЧ БАЙГАА НЬ ЧУХАЛ БИШ. ХҮҮХДҮҮДЭЭ ЗӨВ ХҮМҮҮЖИЛТЭЙ ӨСГӨХИЙН ТУЛД ЗӨВ ҮЛГЭРЛЭХ ХЭРЭГТЭЙ

–

Дорноговьт амьдрах болсон шалтгаан нь юу вэ. Улаанбаатарт арав гаруй жил амьдарсан юм байна?
-Төрсөн нутагтаа ажиллаж, амьдрах шийдвэрийг энэ жил гаргасан. Хотын түгжрэл, чимээ шуугиан, стрессээс хол байх нь амар байна. Нөхөр маань хотод ажиллаж байгаа. Хөдөө амьдрах давуу талуудыг жагсааж бодож байгаад ирсэн. Хоёр том охин маань орон нутаг руу нүүхэд сургууль, найз нөхдөөсөө хол байна гэж бодоод эхэндээ эргэлзсэн. Гэхдээ огт танихгүй газар биш зун, өвлийн амралтаараа энд ирдэг байсан учраас ямар ч асуудал байгаагүй бид нүүж ирсэн. Хотод байхдаа амжуулж чаддаггүй байсан ажлуудаа энд ирээд амжуулж байгаа. Орон нутагтаа ирээд ажиллаж, амьдарч байгаагийн хэрэг гарч байна.

–Ээж нь урлагийн мэргэжилтэй учир хүүхдүүд нь ч энэ тал дээр их сонирхолтой бололтой?
-Хоёр дунд охин маань дандаа бүжиглэе л гээд байдаг. Сургуулийнхаа бүх арга хэмжээ, хаана бүжиглэх боломжтой байна тэнд л байхыг хүсдэг.

–Та амьдралын утга учир, үнэ цэнийг юу гэж ойлгодог вэ?
-Амьдралд эд, хөрөнгө хэрэгтэй нь үнэн. Гэхдээ хаана, юунд амьдарч байгаа нь чухал биш. Хүүхдүүдээ зөв хүмүүжилтэй өсгөхийн тулд зөв үлгэрлэх хэрэгтэй. Амьдарч байгаа орчин нөхцөлдөө тулгуурлаад цэвэрхэн, тухтай амьдрах нь чухал. Одоохондоо бидний амьдрал ийм байгаа ч ирэх жил арай дээрдэнэ. Хүүхдүүдээ их сургуульд орох үед амьдрал сайжирна даа гэх мэтээр бүхнийг эерэгээр төсөөлдөг.

–Үр хүүхдийнхээ төлөө сэтгэл зүрхээ зориулдаг ээж, аавуудад юуг уриалмаар байна?
-Одоо цаг үе хүнд байгаа ч бүх юм сайхан болно. Нэгэнт эцэг эх болсных хүүхдүүдийнхээ өмнө хариуцлагатай байх хэрэгтэй. Тууштай шударга байгаарай. Хүүхдээ зөв хүн болгож өсгөхийн тулд юм болгонд үнэн, чин сэтгэлээсээ хандаасай гэж хүсэж байна. Амьдралаас авч болох хамгийн гоё хайр бол хүүхдүүдийнхээ инээгээд хөгжилдөж байхыг харах юм. Тиймээс юм бүрийг болж бүтэх талаас нь хараарай гэж уриалъя.

–Ярилцсанд баярлалаа. Гэр бүлд нь эрүүл энх, хамгийн сайн сайхныг хүсье.
-Маш их баярлалаа.