Дэлхийн эдийн засаг Хятадын хоёр чуулганы тогтоосон хөтөлбөрөөс ашиг хүртэнэ

Хятадын хоёр чуулган Бээжинд чуулж өнгөрлөө. Энэ он бол 14-р таван жилийн төлөвлөгөөний эхний жил юм. Ийм учраас энэ оны хоёр чуулган чухал ач холбогдолтой байж, дэлхий нийтийн анхаарлын төвд орсон юм. Хятадын Төв Радио Телевизийн сэтгүүлч саяхан хоёр чуулганы талаар Сербийн Азийн орнуудын хамтын ажиллагааны төвийн дарга Зоран Спасикийг сурвалжилсан юм. Тэр хэлэхдээ, энэ оны Хятадын хоёр чуулган дэлхийн эдийн засагт идэвхтэй дохио өгч байна. Хятадын 14-р таван жилийн төлөвлөгөө Хятад улс болон дэлхий дахины ирээдүйн таван жилийн хөгжилд туйлын чухал юм гэжээ. Зоран Спасик хамгийн түрүүнд Хятадын олсон амжилтаар бахархаж, Хятадын ирээдүйд итгэл дүүрэн буйгаа илэрхийллээ.

“Хятадын засгийн газар өнгөрсөн хэдэн арван жилд дэлхий нийтийн анхаарлыг татсан амжилт оллоо. 13-р таван жилийн төлөвлөгөөний дараа Хятад улс чинээлэг нийгэмд алхан орж, дэлхийн ядуурлыг арилгах үйлст үлгэр жишээ үзүүлсэн юм. ХКН байгуулагдсан 100 жилийн ойгоор Хятад улс дэлхийн хамгийн том үйлдвэрлэгч орон болж чадлаа, би Хятадын ирээдүйн хөгжилд итгэл дүүрэн байна ”

Энэ оны Хятадын засгийн газрын ажлын тайланд, 2021 оны Хятадын эдийн засгийн өсөлтийн зорилтыг 6%-ээс дээш байлгана гэж дэвшүүлсэн байна. Үүнд холбогдуулан Зоран Спасик хэлэхдээ, энэ бол Хятадын цар тахалтай тэмцэх томоохон ялалт байгуулсны дараа дэлхий дахинд өгч буй эерэг дохио юм гэжээ.

“Дэлхийн цар тахалтай хийсэн тэмцлийн явцад Хятад улс эдийн засаг нь эерэг өсөлтөд хүрч чадсан дэлхийн цорын ганц эдийн засгийн цогц болж чадлаа. Үүний зэрэгцээ Хятад улс бас Хятадын олон улсын импорт экспортын яармаг, Хятад АСЕАН-ны яармаг зэрэг ажиллагаа зохион байгуулж, дэлхийн эдийн засгийн сэргэлтэд хувь нэмэр оруулсан юм. 2020 оны 4-р улирлын Хятадын эдийн засгийн өсөлтийг эргэн харахад бид Хятадын эдийн засгийн өсөлтөд улам их итгэл найдвар тавьж байна. Хятад улс дэлхийн эдийн засгийг тогтворжуулж, дэлхийн эдийн засгийн сэргэлтийг ахиулах чухал хүчин болсон ”

Зоран Спасик хэлэхдээ, энэ удаагийн Хятадын хоёр чуулганы авч хэлэлцсэн нэг чухал сэдэв бол 14-р таван жилийн төлөвлөгөө болон 2035 оны алс хэтийн хөгжлийн зорилт болно. 14-р таван жилийн төлөвлөгөө бол Хятадын болон дэлхийн ирэх таван жилийн хөгжлийн хувьд маш чухал юм гэжээ.

“Хятадын 14-р таван жилийн төлөвлөгөө болон 2035 оны хэтийн зорилт нь Хятадын эдийн засаг нийгмийн хөгжлийн зүг чигийг зааж өгсөн юм. Хятад улс дотоодын эдийн засгийн том эргэлт болон гадаад дотоодын эдийн засгийн хоёр эргэлтийг уялдуулах хөгжлийн шинэ бодлого хэрэгжүүлж буй нь ирэх таван жилийн Хятадын эдийн засгийг түргэн хөгжүүлэх болно. Хятад улс 1.4 тэрбум хүн амтай, үүнд дунд орлоготой хүн ам 400 сая байна. Энэ бол Хятадын зах зээлийн асар их нөөц бололцоо юм. Хятад улс бол 120 улс орон газар нутгийн худалдааны хамгийн том түнш юм. Үүний хамт маш олон орны экспортын зах зээл юм. Хятадын хоёр эргэлтийн шинэ төлөв байдал нь дэлхийн эдийн засгийн өсөлтийг дайчлах болно”

Зоран Спасик бас Хятадын ядуурлыг арилгах ажилд бүх талаар ялалт байгуулсанд баяр хүргэв. Тэр хэлэхдээ, Хятад улс НҮБ-ын мянган хөгжлийн хөтөлбөрийг урьдаар биелүүлсэн төдийгүй олон улсын ядуурлыг бууруулах үйлст асар их хувь нэмэр оруулсан юм гэжээ.

“Ядуурлыг бууруулах зорилтоос харахад Хятад улс дэлхийн бусад орнуудаас улам түргэн, улам амжилттай ядуурлаас гарсан нь илэрхий байна. Үүний зэрэгцээ Хятад улс бас олон улсын ядуурлыг арилгах үйлст дэлхийн хөгжлийг ахиулах, дэд бүтцээрээ холбогдох, худалдааны харш саадыг арилгах зэрэг бодит санал зөвлөлөө өгч, ”хөгжиж буй орнуудад эдийн засгийн тусламж үзүүлж, дэлхийн ядуурлыг буруулах засаглал ялангуяа өргөн олон хөгжиж буй орнуудын ядуурлыг бууруулахад асар их хувь нэмэр оруулсан юм”.

\Баатар орчуулав\