Бээжин дэх миний амьдралын цаг агаар

Хүмүүс цаг агаарын мэдээ хараад “Өнөөдөр сайхан өдөр” байна гэж баярладаг. Харин миний хувьд цаг агаараас үл хамааран, Бээжин хотод өнгөрүүлж байгаа өдөр бүхэн “Сайхан өдөр” байдаг. Би Бээжинг нартай, бороотой, халуунтай, хүйтэнтэй нь хайрладаг. Яагаад гэвэл энэ хотод ажиллаж амьдарч байгаа хугацаандаа би маш олон үнэ цэнэтэй дурсамжийг бүтээсэн. Бүтээсээр ч байгаа. Хожмын дурсамжийг минь ном гэж үзвэл, тэр номын “Бээжингийн өдрүүд” гэх бүлэг хамгийн амттай, уншууртай нь байх болно. Ингээд Бээжин хот надад яагаад ингэтлээ таалагдсан бэ гэдгийг хэдхэн зүйлээр төлөөлүүлэн товчхон хэлье.
1.Аюулгүй, тайван
Хүн өөрийгөө аюулгүй тайван байна гэдгээ мэдэрсэн үедээ эрх чөлөөтэй, аз жаргалтай, эрх дураараа байж чаддаг. Хятадын эдийн засаг нийгэм хурдтай хөгжиж байгаа сүүлийн жилүүдэд Хятадын ард түмний нүдний харц тогтворжсон. Айж сандарч, яарч адгаж, сэтгэл санаа нь тогтохгүй яваа хүний нүдний харц ч мөн тогтворгүй байдаг. Олон жилийн өмнө хятад хүмүүсийн нүднээс энэ зүйл их ажиглагддаг байсан. Одоо олонх нь, бараг нийтээрээ тогтуун нүдтэй болцгоосон.
2.Хулгай халдлагагүй
Хулгай, биеэ үнэлэлт хоёрыг дэлхийн хамгийн эртний, бас хэзээ ч алга болохгүй мэргэжил гэж ярьдаг ч хөгжлийн явцад тэдгээр гэмт үйлдэлд орших орон зай үлддэггүйг Хятадын жишээнээс харж болох юм. Хятад улс хулгайгүй болсон гэхээр үл итгэн, эргэлзэх хүмүүс олон. Тэрбум гаруй хүний тархийг төр угааж ухамсар сахилгыг нь хуруу инчдэхийн зуурт сайжруулчихав уу гэвэл мэдээж үгүй. Энэ бүхний хариулт нь ердөө л иргэний бүртгэлийн цахим мэдээллийн системээ төгөлдөржүүлж, нийтийн үйлчилгээний бүхий л обьектыг камерын хяналтад оруулсан ололт юм. Ингэснээр зөвхөн хулгай биш, бусдын эрх чөлөөнд халдах аливаа гэмт хэргийн гаралт илт цөөрч, илрүүлэлт маш хялбар болсон юм.
3.Эко хөгжил
Хятад улс эко ногоон уриалгаараа дэлхийн хөгжлийг түүчээлж яваа. Эрүүл аюулгүй орчинд амьдрахаас татгалзах хэн байх билээ. Би чөлөөт цагаараа Хятадын төрөл бүрийн цэцэрлэгт хүрээлэнгүүдээр аялах, алхах дуртай. Хүчилтөрөгчийн баар болсон тэр газрууд хүмүүст амьдралын амт шимтийг улам бүр мэдрүүлж байдаг. Их хотын зүрх уушиг нь барилга байгууламжууд биш амьд ногоон орчин гэдгийг хятадууд дэлхийд үлгэрлэн харуулж байна. Зөвхөн байгалийн нөхөн сэргээлт биш технологийн оновчтой шийдэл, бохирдлыг багасгах бүхий л арга боломжийг чармайн хайж, шинэ ололтуудыг туршин хэрэгжүүлж сайн үр дүнд хүрсээр байгаа нь хайрламаар. Энэ бол Хятад улсын дэлхий нийтэд барьж буй бэлэг гэж би боддог.
Дурдвал маш олон зүйл байх боловч хамгийн чухал гэсэн зүйлсээ эхнээс нь эрэмбэлээд бичиж байтал миний бичвэр 800 ханзнаас хэдийнэ даваад явчихсан тул энэ хүрээд дутуу өндөрлүүлэхэд хүрэв. Би хүн төрөлхтөнийг төлөөлөх эрхгүй ч хүн төрөлхтөний төлөө хийсэн бүгдэд чинь баярлалаа Хятад улс аа.
Б.Занданхүү