И.Мөнхжаргал: Буяныг гаргахгүй, бузрыг оруулахгүй уриатай гаалийн байгууллагаар нь хэдэн мянган тонн нүүрс гарахад МАН мэдэхгүй байна гэж байхгүй

Нүүрсний хулгайтай холбоотой асуудлаар Ардчилсан Нам (АН)-аас өнөөдөр мэдээлэл хийв.

АН-ын Ерөнхий нарийн бичгийн дарга И.Мөнхжаргал “Өчигдрөөс хойш хулгайчдын нэрс энд тэнд яригдлаа. Ичсэн хүн хүн ална гэгчээр МАН-аас сонгогдсон таван гишүүн мэдэгдэл хийж байсан. “Номхон тэмээг ноолоход амар”, “Намдаа нөлөөгүй болохоор намайг дээрэлхлээ”, “Долдугаар ангиасаа хойш нүүрс барьж үзээгүй”, “Тавантолгой хаана байдгийг мэдэхгүй” гэж хэлж байна. Ийм хүмүүсээ нүүрсний хулгайчдаар зарлаж байх шиг байна.

Одоо миний гарт “Эрдэнэс Тавантолгой” ХК-ийн бүх бичиг баримт байна. Тус компаниас үүдэлтэй томоохон хулгайн хэргийг зохион байгуулалттай хийсэн байж болзошгүй байна. Энэ бүхэн Гаалийн Ерөнхий Газар (ГЕГ), МХЕГ, Авто Тээврийн Үндэсний Төв(АТҮТ), “Эрдэнэс Тавантолгой” ХК гэх дөрвөн байгууллага дээр төвлөрч байгаа. Тэгвэл эдгээр байгууллагын удирдлага болон ТУЗ-ийг хэн томилдог юм бэ гэвэл,

• Нэгдүгээрт, ГЕГ-ын даргыг МАН, Сангийн яам томилдог.
• Хоёрдугаарт, “Эрдэнэс Тавантолгой” ХК-ийн захирлыг Засгийн газраас санал болгосноор тухайн компанийн ТУЗ бүрдэж, улмаар гүйцэтгэх захирлаа томилж байгаа.
• Гуравдугаарт, МХЕГ-ын удирдлагуудыг МАН-аас томилдог.
• Дөрөвдүгээрт, АТҮТ-ийн даргыг Засгийн газар болон Зам тээврийн хөгжлийн сайд томилдог.

Гэтэл тэдний үйлдсэн хулгайг 2016 оноос хойш ажилгүй явж байгаа АН-ын гишүүд хийсэн мэтээр нийгэмд сурталчилж байгаа. Эсвэл өөрсдийн намдаа нөлөөгүй хэдэн нөхдөөр туг тахиж үзэж байна.

Бид өчигдөр гурван хүний нэрийг зарласан. Тодруулбал, Сү.Батболд, Ч.Хүрэлбаатар, П.Анужин гурван хүний нэрийг хэлсэн. Өчигдөр зарласан Сү.Батболдын эхнэрийн дүү Б.Асралт нь ГЕГ-ын даргаар ажиллаж байсан. Энгийн логик уялдаа энэ бүхнээс хөвөрч байна. Нүүрсний хулгайтай холбогдсон хүний эхнэрийн дүү нь ГЕГ-ын даргаар томилогдож байдаг.

Буяныг гаргахгүй, бузрыг оруулахгүй гэдэг уриатай гаалийн байгууллагаар хэдэн мянган тонн нүүрс гарахад гаалийн даргын мэдээлэлд орохгүй, МАН мэдэхгүй байна гэж байхгүй. Та бүхэн жүжиг тоглохоо болиод хулгайгаа өөрсдийн Засгийн газар дотроос хайгаад зоримог шийдвэрийг гаргахыг хүсэж байна” хэмээн хэллээ.

Мөн тэрбээр “Өнөөдөр дахиад нүүрсний хулгайд холбогдож буй МАН-ын хоёр гишүүний нэр ирж байна. Тэр хүн нь Хөдөлмөр, нийгмийн хамгааллын сайд Т.Аюурсайхан юм. Таны найз нөхөд, “Эрдэнэс Тавантолгой” ХК-ийн удирдлага,  МАН-ын шинэчлэлийн хөдөлгөөн гэж явсан хулгай. Тиймээс УИХ-ын гишүүн Т.Аюурсайхан таны нэр хамгийн түрүүнд дурдагдаж байгаа.

Мөн УИХ-ын чуулган дээр өөрийгөө нүүрсний хулгайч гэдгээ хүлээн зөвшөөрч хэрүүл хийж байсан яруу найраг уншдаг Ж.Мөнхбат гэдэг залуу яасан бэ” гэлээ.