Хамасын эсрэг дайны хамгийн эрчтэй үе шат өндөрлөж буй тул Израилийн арми анхаарлаа Ливаны хилд хандуулах гэнэ

Ням гарагт Израилийн ерөнхий сайд Бенжамин Нетаньяху дотоодын телевизийн Channel 14 сувагт ярилцлага өгөхдөө Газын зурваст явуулж буй Хамасын эсрэг дайныхаа төлөвлөгөөний талаар өгүүлжээ.

“Хамастай хийх дайны оргил үе төгсгөлдөө ирж байна. Энэ нь дайн дуусах тухай биш, дайны Рафа хот орчимд явагдаж буй одоогийн үе шат өндөрлөнө гэсэн үг” гэж тэр ярьсан байна.

Ингэхдээ Нетаньяху түр гал зогсоох, барьцааны хүмүүсийг буцааж авах асуудлаар Хамас зэвсэгт байгууллагатай “хэсэгчилсэн тохиролцоо”-нд хүрэх боломжтой ч Хамасыг газрын хөрснөөс бүрэн арчих эцсийн зорилгоосоо ухрахгүйг батлан илэрхийлжээ.

Цааш нь ярихдаа тэр “Оргил үе өндөрлөсний дараа бид зарим хүчээ хойд хил дээрээ төвлөрүүлэх болно” гэж хэлсэн нь Ливаны нутаг дэвсгэрээс Израилийн нутагт дайсагнаж буй Хезболла зэвсэгт байгууллагын эсрэг ямар нэг арга хэмжээ авахыг илэрхийлсэн хэрэг бололтой.

Ираны дэмжлэгтэй Исламын хөдөлгөөн Хезболла бол Ойрх Дорнод дахь хамгийн хүчтэй зэвсэгт байгууллагуудын нэг юм.

Өнгөрсөн оны аравдугаар сарын 7-нд Газын зурваст дайн эхэлснээс хойш тус байгууллага Ливаны өмнөд хэсгээс Израилийн нутаг дэвсгэрт байнга довтлох болсон.

Израилийн тал ч Хезболлагийн довтолгоонд хариу арга хэмжээ авч, хүн хүч, гол командлагчдыг нь агаарын цохилтоор устгасаар байгаа.

Энэ мөргөлдөөний улмаас олон арван мянган хүн Израилийн хойд бүс нутгаас дүрвэсэн юм.

Хойд хилийн асуудлаар ярихдаа Нетаньяху “Бидний нэгдүгээр зорилго хамгаалах, хоёрдугаар зорилго иргэдээ орон гэрт нь буцаах байх болно. Хэрвээ бид энэ бүхнийг улс төрийн арга замаар хийж чадвал сайн. Хэрвээ үгүй бол бид өөр аргаар ажиллана. Аль ч тохиолдолд бид бүх иргэдээ орон гэрт нь буцаана” гэжээ.

Хамастай үргэлжилж буй мөргөлдөөнийг энхийн гэрээгээр дуусгах боломжтой эсэхийг асуухад Нетаньяху “Хэрвээ гэрээ гэж байх бол тэр нь зөвхөн манай нөхцөлөөр л байна. Манай нөхцөл бол дайныг дуусгах, Газыг орхин гарах, Хамасыг үлдээхийн аль нь ч биш. Би Хамасыг зүгээр орхихыг зөвшөөрөхгүй. Бид тэднийг арчиж хаяна” гэж мэдэгджээ.

Эх сурвалж: CNN