Б.ДЭЛГЭРСАЙХАН: Богд уулыг нүхлэх эсэхийг иргэдээс асууна

-Богд уулыг 5.4 их наяд төгрөгөөр нүхлэх асуудал хөндөгдөж байна. Энэ талаар тодорхой мэдээлэл өгнө үү?

-Ер нь, олон улсын жишгээр 5.5 их наяд төгрөг гэж тавьсан л юм билээ. Дотооддоо судалгаа хийхэд гаднын орноос Хятад хамгийн бага зардлаар хийдэг юм билээ. Хятадууд 700-800 сая ам.доллар гэж байгаа юм билээ. Яах вэ, олон улсын үнээр нь л зураг төслийн тендер зарлагдсан гэж ойлгосон. Дэлхий нийтийн жишгээс харахад баруунд бол тийм тунель энэ хэмжээний үнэтэй байх нь ойлгомжтой. Манайх бол дэлхийн жишгээр зарласан гэж ойлгох хэрэгтэй.

-Байгаль орчны судалгааг нь хийсэн юм болов уу?

-Давхар хийгдэж байна. Бид өнөө, маргаашдаа ухаж төнхөх гээд байгаа юм биш, тийм боломж ч байхгүй. Маш нарийвчилсэн судалгаа хийнэ шүү дээ. Хөрс нь ямар байхаас эхлүүлээд л судалгаа хийнэ. Ард иргэдээсээ асууна. Юу, юуны туханд хүрэлгүй ухаад эхлэх гэж байгаа юм биш. Дээр нь, энэ асуудал анх өнөөдөр л яригдаж байгаа зүйл биш. 1981 онд хөндөгдөж байсан, ЗХУ-ын хийсэн судалгаа байдаг. Дараа нь, Н.Энхбаярыг Ерөнхий сайд байх үед нь яригдаж л байсан. Тиймээс судалгаа шинжилгээ хийгээд нэг хүн шийддэг асуудал биш. Гадуур учиргүй их үнэ яриад улстөржүүлээд байгаад харамсаж байна. Тэгэхээр нарийвчилсэн судалгаа хийж, ард иргэдэд мэдээлэл өгнө, ард иргэдээсээ ч асууна.

-Ирэх 2025 оны улсын төсөвт хэдэн төгрөг тавигдсан юм бэ?

-Ирэх оны төсөвт нэг ч төгрөг тавигдаагүй. Төсвийн тодотголоор 50 тэрбум төгрөг тавьсан. Тэр нь гүүр, тунель зэрэг дээр л тавигдсан төсөл юм. Ганц уул сэтлэх зүйл биш юм. Эхэлж бид зураг төсөл, техник эдийн засгийн үнэлгээ зэргээ хийнэ. Шанхайд очиж 14 км тунелийг очиж үзсэн. Эдийн засгийн хувьд үр өгөөжтэй гэж тайлбарлаж байна билээ.

-ТЭЗҮ-ийн төсөв нь хэдэн төгрөг байгаа вэ?

-50 тэрбум төгрөг. Эдийн засгийн үр өгөөж нь ТЭЗҮ-гээрээ л гарч ирнэ. Шинэ Зуунмод хот төлөвлөлт зэрэг хийгдэнэ. Бид ард иргэдээсээ асууна.