Америкийн интернет хэрэглэгчид “Шяохуншу” руу хошуурч байна

Хойд Америкийн Apple APP дэлгүүрээс үнэгүй татаж авах программ хангамжийн жагсаалтыг Хятад улсын энэхүү сошиал аппликейшн тэргүүлжээ. Тоо баримтаас үзвэл, 1 дүгээр сарын 8-наас 1 дүгээр сарын 14-ний хооронд АНУ-д Шяохуншуг гар утасны програмд татаж авсан хэмжээ өмнөх 7 хоногтой харьцуулахад 20 дахин, 2024 оны мөн үеийнхээс 30 дахин нэмэгджээ. Гэрийн тэжээвэр амьтадаа гайхуулах, хувцас хунарын тухай, амтат хоол зуушны тухай хуваалцах, түүнчлэн Хятадын интернет сүлжээний анд найзуудтай халуун яриа өрнүүлэхээс  эхлээд Америкийн интернет хэрэглэгчид цагаа сайхан өнгөрүүлж байна.

Шяохуншу яагаад АНУ-д ийм алдартай болж байна вэ? Шууд шалтгаан нь АНУ-ын “Худалдахгүй юм бол хориглох” бодлогын дагуу Хятадын нийгмийн харилцааны TikTok программ хангамжийн хилийн чанад дахь хувилбарыг 19-ний өдрөөс хойш хориглож магадгүй байгаа тул уг  программ хангамжид дуртай Америкийн интернет хэрэглэгчид Шяохуншу руу “нүүж”, түүнчлэн өөрсдийгөө “TikTok-ийн дүрвэгсэд” гэж нэрлэж байна. Шяохуншу дээр танилцуулсан олон шинэ, сонирхолтой агуулга, сэдвийн интерактив нь Америкийн интернет хэрэглэгчдийн анхаарлыг татсан байна. Зарим хүмүүс АНУ-ын засгийн газар TikTok бол үндэсний аюулгүй байдалд заналхийлж байна гэж хашхирч байгааг ойлгохгүй байна гэсэн сэтгэгдэл үлдээж, Шяохуншуг “соёл хоорондын харилцаа”-ны эрдэнэсийн сан болно гэж найдаж байна.

Шяохуншу Америкт алдартай болсон нь Хятад Америкийн ард түмэн харилцан ойлголцож, харилцах хүсэл эрмэлзэлтэй байгааг нэг талаас нь харуулж байна. Америкийн зарим улстөрчид Хятадын хөгжлийг хэчнээн дарж, Хятад улсыг гүтгэн харлуулж байсан ч ард иргэд хоорондын солилцооны иймэрхүү хүсэл зорилтыг хориглон тасалж чадахгүй юм.

Үнэн хэрэгтээ, Хятад Америкийн солилцооны түүхийг эргэн харахад ард иргэд хоорондын ийм сайн сайхан жишээ цөөн бус юм. Дэлхийн 2-р дайны үед Америкийн “нисдэг бар” анги Хятадын ард түмний эсэргүүцлийн дайнд дэмжиж тусалж байснаас авахуулаад Гулингийн хувь барилдлага нь Хятад Америкийн ард иргэн хоорондын сайн сайхан дурсамжуудыг тээж, түүнчлэн “ширээний теннисний дипломат харилцаа”-гаар харилцааны мөсийг хагалсан зэргийг дурдахад, Хятад Америк хоёр орны хувьд түүх, соёл, тогтолцооны зэрэг талын ялгаа зөрөөтэй боловч хоёр орны ард түмэн бие биедээ найрсаг ханддаг, энэ бол Хятад Америкийн харилцаа урт хугацаанд тогтвортой хөгжихийн ундрал булаг билээ.

Сүүлийн хэдэн жилд Хятад Америкийн соёлын солилцоо “хүйтэн давлагаа эсрэг салхи”-тай тулгарсан. Америкийн зарим хүмүүс Хятад улсын хөгжилд сэтгэл түгших нь улам ихсэж, Хятад улсыг “хамгийн том стратегийн өрсөлдөгч” гэж эндүүрч байна. “Харилцааг тасалж, гинжинг салгах” хэмээн хөөрөгдсөнөөс авахуулаад “жижиг хашаа өндөр хана” барьж, тэдний  өдөөн дэвэргэлт дор, Хятад улсыг хязгаарлан дарах нь Америкийн улс төрийн тавцан дахь “улс төрийн зөв зүйл” гэгч болсон. Хятад улсыг эсэргүүцдэг зарим улс төрчид, хэвлэл мэдээллийнхэн бүр “Маккартизм”-ийг сэргээж, “Хятад улсад чиглэсэн үйл ажиллагааны хөтөлбөр”-ийг хэрэгжүүлж, АНУ-д суралцаж буй Хятадын оюутнуудыг шалтгаангүйгээр шалган, үндэслэлгүйгээр хэрэг үүсгэн дарамталж, хоёр орны иргэдийн солилцоонд сэв суулгаж, гадаадын авьяастныг татах АНУ-ын дүр төрх болон технологийн шинэчлэлийн давуу талыг ч хохироосон байна.

Өнгөрсөн оны 11 дүгээр сард Лимад болсон Хятад Америкийн төрийн тэргүүн нарын уулзалтын үеэр Ши Жиньпин дарга өнгөрсөн дөрвөн жилийн хугацаан дахь Хятад Америкийн харилцааны хөгжлөөс авсан долоон зүйлийн туршлагыг нэгтгэн дүгнэж, Хятад Америк хоёр орон яриа хэлэлцээ хамтын ажиллагаа илүү өрнүүлэх ёстой, ард түмний хүлээлтэд хариу өгч, хоёр орны хүмүүсийн солилцоо, соёлын харилцаанд гүүр зам тавьж, түүнчлэн харш саадыг арилгаж, саад тотгорыг зохиомлоор бий болгохоос зайлсхийх ёстой гэсэн юм.

Одоогийн байдлаар, Хятад Америкийн хамтын хүчин чармайлтаар хоёр орны зарим салбарын солилцоо хамтын ажиллагаа тогтворжиж, сэргэж байна. 2024 оны Хятад Америкийн харилцааны хамгийн чухал онцлох үйл явдал бол Ши Жиньпин даргын дурдсан “ирэх 5 жилд Америкийн 50 мянган өсвөр залуучуудыг урьж Хятад улсад суралцуулах” санаачилга үр дүнд хүрсэн явдал бөгөөд Америкийн 50 муж болон Вашингтон ДС-г хамарсан нийт 15 мянга шахам Америкийн өсвөр залуучууд солилцоо хийж, суралцахаар Хятад улсад иржээ.

Хятад улс гадаадын иргэд хилээр нэвтрэхэд тус дөхөм үзүүлэх арга хэмжээгээ үргэлжлүүлэн хэрэгжүүлж байгаа бөгөөд “Хятад улс дахь аялал” нь олон улсын халуун яриа болж, Америкийн маш олон интернетийн алдартнууд, блогчид Хятад улсад ирж аялан танилцаж байна. “Би орчин үеийн, гайхалтай, эрч хүчтэй Хятад улсыг харлаа”, “Энэ нь барууны хэвлэл мэдээллийн хэрэгслээр дүрсэлснээс тэс өөр байсан”… Тэд амтат хоол, үзэсгэлэнт байгаль, Хятад улс дахь сонирхолтой туршлагаа Америкийн ард түмэн болон дэлхийн өнцөг булан бүрт байгаа хүмүүстэй хуваалцаж, үнэн бодит Хятад улсыг дэлхий дахинд харуулж байна.

“Хятад Америкийн харилцааны найдвар ард түмэнд, үндэс суурь нь ард иргэдэд, ирээдүй нь залуучуудад, эрч хүч нь орон нутагт байна”. Хятад Америкийн харилцааны том үүд хаалгыг ард түмэн нээсэн, энэ үүд хаалга нээгдсэн бол дахиж хаагдахгүй гэдгийг өнөө хоёр орны ард түмэн бодит үйлдлээрээ дахин харууллаа.

Хэдхэн хоногийн дараа АНУ-ын шинэ засгийн газар албан ёсоор үүрэгт ажилдаа орно. Хоёр орны ард түмний харилцаж, найрамдалт харилцаагаа нэмэгдүүлэх гэсэн чин хүсэл эрмэлзлийг сонсож, Хятад улстай хамтаар ард түмэн хоорондын харилцаа солилцооны “гүүр байгуулан, зам тавьж”, Хятад Америкийн харилцаа тогтворжиж, сайжирч, урагшлахыг ахиулахыг АНУ-ын шийдвэр гаргагчдад хүсэж байна.