“ОПЕК”-ийн орнууд газрын тосны үйлдвэрлэлийг эрс бууруулах саналыг гаргалаа

Олон улсын зах зээл дээрх  газрын тосны үнэ хурдацтай буурч байгаа. Үүнээс үүдэн Газрын Тос Экспортлогч орнуудын байгууллагаас газрын тосны үйлдвэрлэлийг эрс бууруулах саналыг гаргаад байна. Гэхдээ ОХУ энэхүү саналыг тийм ч таатайгаар хүлээн авахгүй байгаа юм.

БНХАУ, АНУ-ын хоорондох худалдааны дайн газрын тосны салбарт сөргөөр нөлөөлж байсан юм.  Мөн шинэ коронавирусийн тархалт газрын тосны  эрэлтийг  эрс бууруулахад хүргэсэн. Дээрх хоёр шалтгаанаас газрын тосны салбар уналтад ороод байна. Үүсээд байгаа нөхцөл байдалтай холбогдуулан ОПЕК буюу Газрын Тос Экспортлогч орнуудын  байгууллага болон энэ холбооны бүрэлдэхүүнд байдаггүй түүхий нефть экспортлогч орнуудын төлөөлөгчдийн уулзалт Австрийн Вена хотод явагдаж байна.  Пүрэв гарагийн уулзалтаар ОПЕК-ийн орнууд өдөр тутмын газрын тосны үйлдвэрлэлийг 1.5 сая торхоор бууруулах саналыг гаргаад байгаа юм.

Гэхдээ газрын тосны үйлдвэрлэлийн томоохон тоглогч болох ОХУ ОПЕК-ийн саналыг  таатайгаар хүлээн авсангүй. Оросын Эрчим Хүчний сайд  Вена хотыг лхагва гарагт орхин явж, пүрэв гарагийн хуралдаанд оролцоогүй нь  үүний нэг тод илэрхийлэл болжээ. Ираны газрын тосны сайд сэтгүүлчдэд ярилцлага өгөх үеэрээ “Хэрэв саналыг Москва хүлээн авахгүй бол ямар нэгэн гэрээ хийгдэх боломж бүрдэхгүй” гэжээ.

Газрын үнэ өнгөрсөн 18 сарын турш тасралтгүй буурч байна. Шинэ коронавирусний тархалтаас үүдэн агаарын тээврийн болон автомашины хөдөлгөөн эрс буураад байгаа нь газрын тосны эрэлтэд ихээхэн сөргөөр нөлөөлсөн юм.  Пүрэв гарагийн байдлаар Брент маркийн түүхий нефть  нэг торх нь 50.85 ам.долларын ханштай байгаа бол Техасын түүхий  нефть нэг торх нь 46.64 ам.долларын болон буураад байна.  ОПЕК-ийн гишүүн болон гишүүн бус орнуудын уулзалт өнөөдөр үргэлжлэн явагдана.