А.Амбасэлмаа: Эмнэлгийн ажилтнуудын хамгаалах хувцас, хэрэгслийн нөөц байгаа ч хангалттай их биш

Дэлхий дахиныг айдаст автуулаад байгаа шинэ төрлийн коронавирусийн халдвараар өвчилсөн хүний тоо 6065-д хүрч, нас барсан хүний тоо 132-т хүрээд байна. Харин Монгол Улсад одоогоор коронавирусын халдвар бүртгэгдээгүй. Сэжигтэй тохиолдлууд нь үгүйсгэгдсээр байгаа.

Гэсэн хэдий ч манай улс эрсдэл өндөртэй бүс нутгаар нэрлэгдэж байгаа учраас эрүүл мэндийн байгууллагууд болон Засгийн газрын түвшинд урьдчилан сэргийлэх бүх арга хэмжээг авч ажиллаж байгаа юм.

Бид коронавирусийн халдвартай холбоотой цаг үеийн асуудлаар ХӨСҮТ-ийн Тандалт судалгааны албаны дарга А.Амбасэлмаагаас тодрууллаа. 

-Сүүлийн өдрүүдэд гадаадын болон дотоодын маш олон хүн хилээр орж ирж байгаа. Эдгээр иргэд вирус тээгч эсэхэд ямар байдлаар хяналт тавьж байгаа вэ?

-Хилийн мэргэжлийн хяналтаас гарсан дүрмийн дагуу хяналт тавьж иргэдийг хилээр нэвтрүүлж байгаа. Ингэхдээ эрүүл мэндийн асуумж авч, халууныг хэмжээд сэжигтэй байвал шууд тусгаарлаж, вируслогийн лабораторид шинжилгээ авч байна. Харин халуураагүй, амьсгалын замын өвчний шинж тэмдэггүй байвал “Өвчлөл гарсан улсаас орж ирж байгаа учраас биеийн байдалдаа 14 хоногийн турш хяналт тавиарай. Шаардлагатай тохиолдолд яаралтай эмнэлэгт хандаарай” гэсэн зөвлөмж өгөөд хил нэвтрүүлж байгаа.

-Монгол Улсад коронавирусийн халдвар бүртгэгдээгүй хэрнээ эрсдлийн зэрэг нь нэмэгдсээр байгаа. Үүний гол шалтгаан нь юу вэ?

-Бид эрсдэлийн үнэлгээг өвчлөл орж ирээгүй байхад хийж байгаа шүү дээ. Анх нэгдүгээр сарын 6-нд эрсдэлийн үнэлгээ хийсэн. Энэ бол “Монгол Улсад вирусийн халдвар зөөгдөж орж ирэх эрсдэл хэр байна вэ” гэдгийг хэлж байгаа юм. Вирус орж ирээгүй байхад орж ирэх эрсдэлийг тооцоод урьдчилан сэргийлэх авах хариу арга хэмжээгээ төлөвлөх гэж үнэлгээ хийсэн. Тэр үед дэлхий нийтэд ч эрсдэл бага байсан. ДЭМБ ч үүнийг хэлсэн. Түүнээс хойш өвчний зөөвөрлөлт нэмэгдэж, манай хил залгаа боомтуудын цаадах хотуудад илэрсэн. Энэ нь Монгол Улсын эрсдэлийг нэмсэн гэсэн үг.

-Олон хүний гар хүрдэг хаалганы бариулыг халдваргүйжүүлэх уусмалд норгосон марль, даавуугаар ороох нь буруу, зөв гэсэн зөрүүтэй мэдээлэл яваад байна. Энэ талаар мэдээлэл өгөөч?

-Марль эсвэл цагаан даавуугаар хаалганы бариулаа боож, ороох нь өөрөө нян үржих суурь болдог учраас буруу. Харин оронд нь хаалганыхаа гар хүрч болох бүх л гадаргууг хоёр цаг тутамд хлорын уусмал шингээсэн алчуураар арчиж, чийгтэй цэвэрлэгээ хийхийг зөвлөж байна.

-Спиртэнд тэсвэргүй учраас гэртээ спирт юм уу архи цацах хэрэгтэй гэсэн ойлголт хүмүүсийн дунд байна. Энэ зөв үү?

-Бас л буруу. Спирт, архи цацаж огт болохгүй. Иргэд зөвхөн эрүүл мэндийн байгууллагаас гаргасан заавар, зөвлөгөөг л дагаж, хэрэгжүүлэх хэрэгтэй. Ам дамжсан худал мэдээлэлд итгэж өөрсдийнхөө эрүүл мэндийг эрсдэлд оруулмааргүй байна.

-Эмнэлгийн ажилтнуудын хамгаалах хувцас, хэрэгслийн нөөц хангалттай байгаа юу?

-Хамгаалах хувцас, хэрэгслийн хувьд тодорхой хэмжээний нөөц байгаа. Гэхдээ хангалттай их биш. Тиймээс бид хамгаалах хувцас хэрэгсэл шаардлагатай гэдэг хүсэлтээ төр засагтаа хүргүүлсэн.

-Коронавируст халдварын эрсдлээс энгийн аргаар яаж урьдчилан сэргийлэх вэ?

-Иргэдийн хувьд коронавируст халдварын эрсдлээс урьдчилан сэргийлэхээс гадна улирлын томуугаас урьдчилан сэргийлэх хэрэгтэй байна. Ингэхдээ, ДЭМБ-аас иргэдийг гараа тогтмол угаах, энгийн маск зүүх ёстойг анхааруулж байна. Маскаа хоёр цаг тутамд солих хэрэгтэй. Бохир маскаа  бохирдсон хэсгийг нь дотогшоо нугалж хаях ёстой. Хүүхэд бол маск хийх уутыг бэлдэж өгөх шаардлагатай. Томуугийн төрлийн вирус агаар дуслын замаар халдаж байгаа учраас ханиаж, найтаахдаа ам хамраа сайн дарах хэрэгтэй. Мөн өрөө тасалгаанд хоёр цаг тутамд нойтон цэвэрлэгээ хийх, өвчлөл гарсан бүс нутагт аль болох зорчихгүй байх, гараа савандаж угаах, халдваргүйжүүлэгч хэрэглэх, амьсгалын замын өвчтэй хүнтэй хамт байхаас зайлсхийх, мах, өндгийг сайтар болгож хэрэглэх, халуурах, ханиалгах зэрэг амьсгалын замын халдварын шинж тэмдэг илэрвэл эрүүл мэндийн байгууллагад хандах хэрэгтэй гэж зөвлөмөөр байна.

-АМНЫ ХААЛТНЫ АСУУДЛААР ОЛОН УЛСЫН БАЙГУУЛЛАГАД ХАНДАЖ БАЙНА-

Харин сүүлийн өдрүүдэд хомсдож, олон нийтийн дунд эрэлт үүсгээд байгаа амны хаалтны нөөцийн асуудлаар, Эрүүл мэндийн сайд Д.Сарангэрэлээс тодруулахад, “Амны хаалт, гар ариутгах бүтээгдэхүүний үйлдвэрлэлийг хувийн хэвшил хариуцдаг.  Улсдаа ганц үйлдвэртэй. Энэхүү үйлдвэр нь БНХАУ-аас түүхий эдээ авдаг. Тэрхүү түүхий эдийн үйлдвэр нь БНХАУ-ын Хубэй мужид байдаг тул түүхий эдээ авахад асуудал үүсэж байна. Гэхдээ түүхий эдийн нөөц дууссан гэж ойлгож болохгүй. Бид донор орнуудтайгаа ярилцана. Энэтхэг, Солонгос зэрэг улсад хандсан. Эдгээр улсад өөрсдөд нь амны хаалт хомсдож байна. Тиймээс олон улсын байгууллагад хандаж байна” гэв.