Германы Засгийн газраас мэргэжлийн боловсрол, сургалтын салбарт тусгайлан дэмжлэг үзүүлнэ

ХБНГУ-ын Засгийн газраас Монгол Улсын мэргэжлийн боловсрол, сургалтын салбарт тусгайлан Коронавирус цар тахлаас сэргийлэхэд үзүүлэх дэмжлэгийг өнөөдөр танилцуулна.

Хүндэтгэлийн ёслолд ХБНГУ-ын Элчин Сайд Ёорн Розенберг, Хөдөлмөр, Нийгмийн Хамгааллын Сайд А.Ариунзаяа нар оролцож, нэмэлт хамтын ажиллагааны хүрээнд хэрэгжүүлэх ажлуудыг танилцуулах юм байна.

Дэмжлэгийн эхний үр дүн болох мэргэжлийн боловсрол, сургалтын салбарын Цахим Сургалтын Санг өнөөдөр нээх бөгөөд уг санг үндэсний хэмжээний 81 МБСБ-ын багш, сурагчид ашиглах боломж ийнхүү нээгдэж байгаа юм.

МБС-ын Цахим Сургалтын Сан нь МБС-ын салбар дахь цахим хичээлийн хэрэглэгдэхүүнийг бүгдийг багтааж байршуулсан нэгдмэл сан юм. Энэхүү дэмжлэгийн хүрээнд МБС-ын салбарт коронавирусээс шалтгаалан үүссэн сорилтуудыг давах, цаашид бэлтгэлтэй байх үүднээс цахим сургалтын боломж, чадавхийг нэмэгдүүлэх, багш нарыг чадавхжуулах, сургалтын байгууллагуудын цахим сургалтад шаардагдах дэд бүтцийг сайжруулах, онцгой байдлын нөхцөлд МБС-ын байгууллагын эрүүл ахуй, ариутгал, халдавргүйжүүлэлтийн дэглэмийг сахиж аюулгүй байдлыг хангах, цаашид хэрэгжүүлэх заавар зөвлөмж боловсруулах, төгсөгчдийн хөдөлмөр эрхлэлтийг дэмжих, ажил мэргэжлийн чиг баримжаа олгох зөвлөгөөг цахимаар хөгжлийн бэрхшээлтэй иргэдэд олгох болон салбарын нэр хүнд, үнэ цэнийг олон нийтэд танилцуулах зэрэг үйл ажиллагааг хэрэгжүүлэх юм байна.

Нэмэлт дэмжлэгийн хүрээнд хийгдэх үйл ажиллагааг Монгол Улсын ХНХЯ-тай хамтран Германы Олон Улсын Хамтын Ажиллагааны Нийгэмлэгийн хэрэгжүүлж буй “Түншлэлд суурилсан техникийн болон мэргэжлийн боловсрол, сургалт” төсөл бусад түншлэгч байгууллагуудтай хамтран хэрэгжүүлнэ.