Иргэдийн банкны зээлийн талаар Засгийн газар хэлэлцэж магадгүй

Дэлхийн эдийн засаг бүхлээрээ 80 триллион ам.доллар. Ковид-19-ийн халдвараас болж дэлхий дахин 1,1 триллион долларын алдагдал хүлээнэ гэсэн тооцоог судлаачид хийжээ.

Тэгвэл манай улсын эдийн засаг энэ өвчнөөс болж 0,8 хувиар буурч, нэг их наяд төгрөгийн алдагдал хүлээж болзошгүй гэсэн урьдчилсан тооцоог Сангийн яамныхан хийж. Сайд Ч.Хүрэлбаатарын хэлснээр энэ сарын 19-ний буюу Цагаан сарын өмнөх байдлаар улсын төсвийн орлого 202,7 тэрбум төгрөгөөр тасалджээ.

Эдгээр мэдээлэлтэй зэрэгцээд өнгөрөгч долоо хоногт УИХ-ын Аюулгүй байдал, гадаад бодлогын байнгын хороон дарга Т.Аюурсайхан үүссэн нөхцөл байдалтай холбогдуулан аж ахуйн нэгж, хүн амын орлогын албан татвар, мөн гаалийн албан татварыг эргэж харж үзэх боломж бий эсэхийг судалж үзэхийг хүссэн юм. Харин Ерөнхий сайд У.Хүрэлсүх эдийн засгийн хүндрэлийг хохирол багатай даван туулах ямар боломжууд байгаа талаар холбогдох агентлаг, яамдын удирдлагуудтай уулзаж ярилцахаар төлөвлөсөн бөгөөд Засгийн газрын ээлжит хуралдаан өнөөдөр, эсвэл маргааш болж магадгүй аж. Уг хуралдаанаар иргэдийн зээлийн хүүг харж үзэх боломж бий эсэх талаар хөндөгдөж болзошгүй хэмээн зарим эх сурвалж хэллээ.

Харин эдийн засагчид Ерөнхийлөгч ахмадуудын тэтгэврийн зээлийг чөлөөлчихсөн. Гэтэл дээрээс нь нэмээд банкны зээлийн хүүг бууруулчихвал инфляцид сөргөөр нөлөөлж, улмаар эдийн засагт таагүй нөлөө үзүүлнэ гэж болгоомжилж байна. Тэдний хэлж буйгаар Хятадын эдийн засаг хямарч эхэлсэн нь ойлгомжтой болсон учраас дагаад манай улсын эдийн засаг Сангийн сайдын хэлж байгаагаас ч илүү хэмжээнд унаж болзошгүй ажээ. Үүнд төсвийн гол орлогыг бүрдүүлдэг нүүрсний экспортыг зогсоосон нь ихээхэн түлхэц болно. Мөн төмөр зам, агаарын тээвэр, аялал жуулчлал, хүнсний салбарт ч том цохилт өгөх нь гарцаагүй.

Дэлхий дахины хувьд аялал жуулчлал, агаарын болон усан замын тээвэр, хувьцаа, үл хөдлөх хөрөнгө, мөн хөдөө аж ахуй, хүнсний болон ашигт малтмалын салбарууд хамгийн түрүүнд цохилтыг амсаад эхэлчихсэн хэмээн шинжээчид гаднын хэвлэлүүдэд бичих боллоо. Үүгээр тогтохгүй энтертайнмэнт урлаг, шоу бизнесийн салбарт ч коронавирус зохих эрсдэлийг учруулна гэдгийг хэлж байна. Ялангуяа вирус сүүлийн өдрүүдэд асар хурдтай тархаж байгаа Өмнөд Солонгосын энтертайнмэнт салбарт томоохон эрсдэл учирна гэж өрнөдийн шинжээчид үзжээ. Тус улсын шоу бизнесийн салбарт эргэлдэх мөнгөний хэмжээг 100 тэрбум ам.долларыг хол давсан гэж хэлж болно. Энэ нь Самсунг, Кореан Эйр зэрэг үндэсний томоохон гигантуудын жилийн орлогоос илүү гэсэн үг. Зөвхөн хөвгүүдийн алдартай хамтлаг BTS-ийн 2019 оны мөнгөний эргэлт 4.6 тэрбум долларт хүрснийг Bloomberg мэдээлжээ.

#МонголТөр